السبت، 20 فبراير، 2010

لا للأحكام السريعة على المواقف

حاجة كنت أحيانا بنفذها..بس دلوقتى بقت مبدأ لا يتجزأ من حياتى
"لا للأحكام السريعة على المواقف"
أتعلمت أن لو حصل موقف و جه حد حكالى عليه مهما كان الحد ده أنا بثق فيه و فى دماغه..مش ححكم على الموقف غير لما اسمع من طرفين
لأنى معنديش الصورة كاملة و يكفى إن الطرف التانى مش موجود عشان أقول كدة مهما بان ليا إن الحق كله مع الشخص ده ..و ده مش قله ثقة فى الشخص اللى قدامى أو أنه كداب..لأ طبعا..بس مهما كان الشخص ده هو بيحكى الموقف من وجهة نظره هو و اللى هو شايفه و غيره ممكن يكون شايف حاجة تانية خالص..و أنا لو آخدت بكلام واحد بس يبقى ماشية بوجهة نظره مش وجهة نظرى أنا و ده معناه إنى معرضة للخطأ او عدم الفهم فى نقطة معينة...عشان كدة أتعلمت أنى مش ححكم على شخص أو موقف من كلام طرف واحد يأما اسمع جميع الأطراف و أحكم يأما مليش دعوة بالموضوع أصلا

حاجة أخيرة بقى عايزة اقولها...معلش هى البوستات بتاخد وقت على بال ما تنزل لانى و الله وقتى مش ملكى خالص بس أنا بتابعكم كل كام يوم
البوستات بس هى الفترات بينها اللى ممكن تكون طويلة شوية

تحياتى

:)

هناك 19 تعليقًا:

SHAPE YOUR LIFE (ABOALI) يقول...

يااااااااااااا عينى على الكلام الموزون

طب مافيش لاخوكى الغلبان 5 كيلو من الكلام ده

SHAPE YOUR LIFE (ABOALI) يقول...

بصى يا انسانة اصبتى بالفعل وده شيىء ممتاز

وضحى بقى الصورة العكسية من عدم سماع الطرفين
1- انفعال فى اتخاذ القرار
2- القاء اللوم او الظلم احد الطرفين
3-الشعور بالكره لدى الطرف الاخر
4-خسارة الصداقات والاعمال ان كان عمل
5- افتقاد روح الفريق والحوار الايجابى

وغيرها من الصور العكسية
وللاسف فى مصر بنحكم من على الظاهر ونترك العمق

شغل من على الوش كما يقول

ملعش يا انسانة مقدرين مشغولايتك الجسام
فى الاستماع الى كل شعب مصر

ومنتظرين حكمك النهااااااااااائى
بس لعلمك

انااااااااا برىء من كل الاتهامات دى

وانا داخل المدونة المرة دى لبست كمامة
احمدك ياااااااااااارب

تقديرى لما كتبتى

انا ودماغي يقول...

D:

ايوة كدة..أنت البس كمامة..لكن انا مش حغير الريحة
تمام كدة ؟؟ D:

بجد معاك حق جدا فى كل الكلام ده و تقريبا كل النقط دى حصلت معايا فى موقف واحد بس خلتنى فعلت أعمل وقفة

:)

بَرَاء يقول...

عشان انتي قلتي أصلي الأول على النبي

فهو عليه الصلاة والسلام قال حاجة قريبة جداً من موضوعك :
((ولعل بعضكم أن يكون ألحن بحجته من بعض))

والحديث ده قاله على أي اتنين ييجوا يتخاصموا عنده .. وكل واحد يقول حجته ..
وممكن اللي معاه الحق مايكونش عنده القوة في عرض حجته .. والغلطان ينتصر برأيه في الآخر عشان عنده القوة والقدرة دي ..

يعني مش كفاية إنك تسمعي بس من الطرفين .. ده كمان تحاولي تستنتجي اللي ورا كلام كل واحد فيهم .. وتقدّري الحالة البلاغية والأسلوبية لكل واحد ..

ويستحسن من وجهة نظري ، عشان تراعي النقطة دي ، تكوني عارفة شخصية كل واحد فيهم ولو معرفة بسيطة ..

يعني فلان ده مثلاً معروف بالملاوعة واللف والدوران يعني من الآخر كده بياع كلام .. وفلان التاني قدرته على الإقناع ضعيفة ..

يبقى هنا قبل ما يتكلموا هما الاتنين .. تخلي بالك من النقطة دي .. ولو لاقيتي نفسك مش قادرة تميزي ، يبقى تطلبي منهم يعفوكي أحسن من الحكم ، عشان ماتوقعيش نفسك في الغلط ، وتظلمي حد فيهم غصب عنك ..

ياريت أكون أفدتك ، زي ما أفدتيني بتعليقك المميز جداً في موضوع التدخين الموجود في مدونتي ، واللي بعتز بيه جداً ، لأنه أحسن تعليق جالي لحد دلوقتي ..

وحاولي ماتغيبيش عنا كتير

كل الود

بَرَاء

انا ودماغي يقول...

ربنا يعزك يا براء
شكرا جدا على ردك و هو فعلا فادنى اوى و معاك حق فيه

أما بالنسبة للغيبة فانا فعلا بحاول..لكن بجد الموضوع مش بإيدى أبدا

شبــ اون لاين ـــاب يقول...

السرعه عموما تولد الاخطاء

--------------

اسف بجد على انى مش بقدر اتابع اول باول

لكن انا قررت اتابع زى زمان

و رجعت مره تانيه للتواصل


------------------------
كان معكى من امام الكيبورد
واحد مخه لاسع شويه
شبــــ اون لاين ـــاب
الاسكندريه
------------------------

mohamed ghalia يقول...

معكى حق
لازم ناخد وقتنا أوى وبعدين نحكم التسرع نتيجتة سيئة
ربنا يوفقك دايما فى كل قراراتك

Lady E يقول...

دماغ فعلا يا اميرة

بجد وحشاني جدا

وبوست جميل اوي

عجبني مقولة جميلة اوي بتقول احنا مش مخلوقين علشان نصدر احكام لو حكمنا على الناس مين له الحق انه يحكم علينا

بجد تسلم دماغك

شبــ اون لاين ـــاب يقول...

عندك حق


ممكن حد يتظلم من الطرفين لما تحكمى بسرعه


لكن لما تكونى عندك كل المعلومات بتقدرى تحكمى صح


حتى ف الحياه لازم الهدوء


-----------------------
كان معكى من امام الكيبورد
واحدمخه لاسع شويه
شبـــ اون لاين ـــاب
الاسكندريه
-----------------------

mahasen saber يقول...

صح كدا يا اميره منحكمش على حاجه ولاا على حد الا لما نعرف ونتأكد ونشوف بنفسنا

تمام كدا يا جميله

إبتسامة ملاك يقول...

عجبتنى اووى الفكره بكلامك

ربنا يهدينا كلنا للثواب
والمفروض مش نحكم على الاخرين بسرعه لان كل كلمه هنتحاسب عليها
يارب تكونى بخير حبيبتى
ويطمنى عليكى
دمتى بكل خير

micheal يقول...

متفق معاكي لأن لازم تبقى الصورة كاملة قدام الواحد
تحياتي

بسنت صلاح الدين يقول...

ياريت كل الناس زيك مكانش حد فهم التانى غلط او حصلت مشاكل بس و زى اسم مدونتك للأسف كل واحد بقى و دماغه

كيكى عوووووو يقول...

انا هاكلك على تاخيرك المستمر دة
ومش هقبل اعذارك ابدااااااا
ومش هسمع من الطرف تانى
هااااا
عووووووووووو

د/ رامي شهاب الدين يقول...

مظبوط كلامك

فى التأنى السلامة وفى العجلة الندامة

ماهو لازم يكون فيه متسع للوقت للحكم بتريث على الأمور ، وحتى تتضح الصورة كاملة ، ويمكن بمقتضاها إتخاذ قرار صحيح لانندم عليه مستقبلا

أحسنتى

دمتى بكل الود .. تحياتى

الأرمـوطــي يقول...

السلام عليكم
معاكى حق لازم الواحد يسمع من جميع الاطراف دة فى حالة افتراض حسن النية لكن للاسف دلوقتى سوء النية كتير فى ناس تيجى تزم فى واحد قدامك والواحد دة يكون صاحب الى بيحكيلك عشان تشوفك هتقولى علية ايه وتروح تقولة يالا هنعمل ايه
نسال الله السلامة
سلام

حياتي كلها لله يقول...

السلام عليكم

أنا رجعت للتدوين تاني و ىسفة فعلا علي تقصيري
بس محش بقي يزرني ليه ....يا جماعة زعلتوني من نفسي قوي )):

تحياتي
سلمي

غير معرف يقول...

ثقافة الهزيمة .. عصابة البقرة الضاحكة‏ 2

فى مارينا مصيف الصفوة السياسية يقول أحد أفراد الأمن بالمنطقة أول فيلا هنا أتبنت كانت لإبراهيم سليمان وزير الأسكان السابق بعدها حدد الناس اللى تسكن المكان، خصوصا أنه أهدى علاء وجمال أبناء الرئيس السابق قصرين على بعد خطوات من فيلته، ثمن الواحد منهم يعدى الـ 40 مليون جنية ( حوالى 7 مليون دولار ) ومسجلين بأسماء هايدى وخديجة زوجاتهم.

و أستطرد: فى لسان الوزراء يسكن إيضا أحمد شفيق رئيس الوزراء السابق وهو عضو فى أتحاد الشاغلين بمارينا، والوحيد من الوزراء السابقين الذى جاء بعد الثورة إلى مارينا، و له فيلا يقدر ثمنها الآن من 15 إلى 20 مليون جنية ( حوالى 3 مليون دولار ) ونفس السعر لفيلا نائب رئيس الجمهورية السابق عمر سليمان .

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى www.ouregypt.us


مصر كلها تتساءل لماذا لم يتم للأن التحقيق مع أحمد شفيق و عمر سليمان بشأن ممتلكاتهم؟

Uouo Uo يقول...


thank you

سعودي اوتو