الخميس، 11 فبراير، 2010

خليك واثق فى نفسك

سورى يا جماعة..البوست اتأخر شوية عشان كنت فى السفر و لسة راجعة........" اوكى الله يسلمكم:D"
عايزة الأول أتكلم عن أول تغير ليا..اللى بجد كان نفسى يحصل و كنت مخنوقة منه..كانت أحدى عيوبى انى معنديش ثقة فى نفسى..كنت بمثل انها عندى و ممكن البعض انخدعوا لكن بينى و بين نفسى كنت عارفة انى معنديش ثقة فى نفسى خالص..بس الفترة اللى فاتت اتأكدت ان حرام عليا ميكونش عندى ثقة بنفسى..لأ ده حرام على اى حد ميكونش عنده الثقة دى..لقتيت من احتكاكى مع البشر عموما و بالذات فى الفترة اللى كنت بعمل فيها الإنترفيوز للناس اللى مقدمة فى "إيه بى سى" إن كل واحد فينا ليه حاجة مميزة اوى فيه و كل واحد عنده حاجة مش عند التانى يعنى انت زى ما فيك كذا و كذا و كذا أنا كمان عندى كذا و كذا و كذا..كل واحد فينا له الحتة اللى متفوق فيها فبالتالى عدم الثقة ده ملوش أى معنى..حاجة تانية خلتنى اقدر اعزز ثقتى بنفسى..مسكت ورقة و قلم و كتبت مميزاتى اللى انا و الناس اللى تعرفنى شايفنها فيها و هى ( القدرة على حل المشكلات-بعرف اكسر اى حاجز بينى و بين الناس الغرب-بعرف احمس الناس فى الشغل-بعرف اهزر-عندى قدرة على الإقناع)هى دى المميزات اللى انا و غيرى قادرين نشوفها عندى و بدات اشتغل عليهم و اتصرف على اساسهم و ابالغ فيهم .. و جت النتيجة مش طبيعية..كمية الفرحة اللى كنت بشوفها فى عنين اللى كنت معاهم و كمية الناس اللى عرفتها و الناس اللى جت تكلمنى لاول مرة بس عشان عايزة تقف معايا و كمية الشغل اللى انجزناه و احنا سهرانين بعد يوم شعل مهلك فى الجامعة ما بين المحاضرات و "إيه بى سى" خلونى حاسة إنى اسعد إنساسة فى الدنيا و بدأت احس بثقتى فى نفسى لما لقيت ان اللى حواليا اصلا واثقين فيا يبقى إزاى أنا مثقش فى نفسى..كنت سعيدة أوى لما الثقة لقيتها و لقيت معاها سلام نفسى و طمأنينة مش عارفة أوصفهم..
بجد عدم الثقة فى النفس شعور وحش أوى و مش المفروض أنه يكون عند أى حد..و بحب دايما أقل مقولة كنت قريتها و عجبتى أوى أوى ..
Know Well That There Is No One Is Youer Than You
يعنى من الآخر محدش حيكون زيك اكتر منك ..فعشان كدة كل واحد فينا فريد من نوعه و لازم يعرف كدة..دى كانت أول حاجة أتغيرت فيا و سعيدة سعادة مش طبيعية بيها..

هناك 34 تعليقًا:

بَرَاء يقول...

السلام عليكم

قبل أي شيء أنا سعيد بزيارتي الأولى لمدونتك ،، اللي أجمل ما فيها بساطتها زي بساطة صاحبتها

جميل أوي النتيجة اللي انتي وصلتي لها .. الثقة بالنفس

لأنها مفقودة عند ناس كتير .. أنا كنت واحد منهم .. بس انا كنت فاقد الثقة دي في حاجات معينة وقليلة

بس وصلت لنفس اللي انتي وصلتي له ، بنفس الطريقة

إني أحصيت كل مميزاتي وركزت أوي عليها ، لحد ما بقيت مش بس واثق في نفسي .. لكن كمان مغرور !

وده اللي مش عاوزك توصلي له ..
لأنّ فيه شعرة صغيرة بتفصل بين الغرور وبين الثقة بالنفس ..
الشعرة دي هي ببساطة : الآخرين

بمعنى أنا لازم أكون بحب نفسي وواثق فيها ، لكن لازم مع ده أكون بحب الآخرين وبثق برضه في الطيبين منهم ..

وده اللي بيخلق نوع من التوازن بين الغرور وبين الانهزامية ..

تحياتي ليكي
ومعلش طولت عليكي

مودتي

انا ودماغي يقول...

و عليكم السلام

أنا كمان سعيدة جدا بالزيارة و يا رب ما تكون الاخيرة :)

و اللهم انى اعوذ بك من الكبر :)..
ربنا ما يوصل حد ليه..لازم دايما نفكر نفسنا ان زى ما احنا فينا حاجات مش فى حد غيرنا كمان احنا محتاجنله و فيه حاجات مش عندنا :)

و مكنش فيه تطويل..بالعكس تعليقك اسعدنى :)

SHAPE YOUR LIFE (ABOALI) يقول...

هههههههههههههه
ثقة ثقة بصحيح
بصى بقى هاتكلم كام كلمة كده بالعنكليزى بتاعى المكسر

if u want to taste the scccess u need
frist to be Self-confident in your self by analysis your self
then the knowledge is power
so the 2nd thing learn and develop your self
then 3rd thing is enthusiam is the tarin of the success

as u do as u gain


مبسوط اكيد وانا باقرء البوست لانى شايف فى حروفك الفرحة والبسمة
وثقتك انك تقتدرى تعملى حاجات كتيرة
وتغيرى فى نفسك وكمان بكرة تغيرى فى غيرك
واد ايه بيكون شعور النجاح لذيذ
وطعمه رائع
وكمان الفشل بيكون طريق اتعلمنا منه علشان نشوف اننا كنا مخطئين فى نقطة ونصلحها وننجح تانى

برافوا عليكى يا دماغى

بس برضوا
الريحة فظيعة فظيعة

elsha3er يقول...

حمدالله على السلامة

ويارب تكونى بخير

تحياتى

احمد الشاعر

MaNoOoSh يقول...

فعلا
الثقة بالنفس بتفرق كتيييييييييييييييييييييييييييير في تغيير شخصيتنا للأحسن

عن تجربة شخصية بردو

mohamed ghalia يقول...

..
Know Well That There Is No One Is Youer Than You
دايما بقول كده وربنا
لازم تكون نفسك
ربنا يسعدك دايما

SHAPE YOUR LIFE (ABOALI) يقول...

Know Well That There Is No One Is Youer Than You

الجملة دى فى ان

مش عارف فيها ايه بس تقريبا YOUR دى هى فعلا ولا هى مش هى

NO ONE KNOW U AS U KNOW U

وعجبى

نـــــــــــــور يقول...

حلوه اوى الفكره دى جامده بصراحه
كان مفروض ترفقيها بفيديو احمد مكى:) حلوة اوى اغنيته كمان

ازيك يابت يااموره

الأرمـوطــي يقول...

الثقة فى النفس موضوع مهم بشكرك عشان اتطرقتى لية واعتقد ان عدم الثقة فى النفس نتيجة ان الانسان غلط غلطات كتيرة اوكبيرة والثقة بترجع تانى لما الانسان بيحقق انجازات فى حياتة بتصرفاتة الصح بوست هايل
تحياتى ليكى

انا ودماغي يقول...

ابو على..

معاك حق فى كل كلمة قلتها..و حعمل نفسى مقرتش آخر جملة

انا ودماغي يقول...

الشاعر..

الله يسلمك يا رب

انا ودماغي يقول...

منوش..

قشطة
;)

انا ودماغي يقول...

محمد غالية..

ربنا يكرمك يا رب

:)

انا ودماغي يقول...

أبو على..

D:
هى مفيش كلمة أسمها youer بس هى على وزن bigger و larger و كدة معناها يعناها مفيش حد زيك أكتر منك

انا ودماغي يقول...

نور..

أنا تمام يا حبيبتى..إزيك انتى؟؟

معاكى حق..اغنية احمد مكى عملت معايا شغل فى الفترة دى برضه D:

انا ودماغي يقول...

الأرموطى..

معاك حق فى كل كلمة قلتها على فكرة
:)

الفقيرة إلى الله أم البنات يقول...

انا جايه ااقولك وحشتينى قوى
وحمد الله على السلامه
انت جميله وكونك انت هو الأجمل وأوعى تفكرى تكونى حد تانى
اللى بيكون حد تانى بيبقى مسخ اما اللى بيبقى نفسه بيقى الاصل
وانت الاصل يا جميله يا صغيورة

elsha3er يقول...

السلام عليكم

انا جاى اوضح نقطة صغيرة لردك عندى كلمة رب هنا مش بمعنى الله رب فى اللغة العربية بمعنى صاحب زى مثلا لما قول انا رب هذا القلم او هذا المنزل كل شئ املكه اقدر اقول عليه رب

اتمنى انى اكون وضحت وجهة نظرى


تحياتى

احمد الشاعر

شبــ اون لاين ـــاب يقول...

happy
valentines
day


joker

كيكى عوووووو يقول...

محدش حيكون زيك اكتر منك!!
صح
ماتاخدينى معاكى

elsha3er يقول...

السلام عليكم

لا كسفة ولا حاجة ومقامك وعلمك على راسى
لكى كل احترام وتقدير

تحياتى

احمد الشاعر

انا ودماغي يقول...

أم البنات..

بجد متعرفيش أنا فرحت إزاى لما زرتينى انتى كمان وحشانى اوى أوى أوى

بحـــــــــــبك

انا ودماغي يقول...

جوكر..

و انت طيب :)

انا ودماغي يقول...

كيكى..

تعالى يللاااااااا

دعاء مواجهات يقول...

خلينى اهنيكى بجد ع الخطوة الجميلة دى واقولك استمرى لان الثقة بالنفس اول درجة على سل النجاح

بالتوفيق ديما ..

أمل حمدي يقول...

ربنا يصلح حالك يارب
ودايما تتغيري للأحسن
دمت بكل الحب

حصان المرجيحة يقول...

تخيلي ان حتي الثقة في النفس بقت بتيجي بالتعليم او التلقين بدل ما تبقي جاية من جوانا
يعني مثلا في الشركة بنجيب محاضرين يعلم المندوب الثقة في نفسه علشان يقدر يقنع اللي قدامه
يللا طولت عليكي
شكرا ليكي
تقبلي مروري

EMMY BABY يقول...

اميييييييييرة

جميلة فرحتك فى الكلام والله

ربنا يحققلك كل اللى بتتمنيه دايما

الثقة بالنفس مهمة جدااااااا بس فى فرق مابين الثقة بالنفس وتقدير الذات

ربنا يوفقك يارب

تحياتى

ايمى

انا ودماغي يقول...

دعاء مواجهات..

ربنا يكرمك يا حبيبتى
بجد متعرفيش زيارتك فرحتنى إزاى
:)

انا ودماغي يقول...

أمل حمدي ..

اللهم آمييين يا رب و إياكم كمان

:)

انا ودماغي يقول...

حصان المرجيحة..

و فى كتب فيها كمان..لأن الثقة زى حاجات كتير ممكن تبدأ تفقدها لو حياتك ماشية غلط للآسف

شكرا على الزيارة :)

انا ودماغي يقول...

EMMY BABY..

يا إييييييييييمى

إزيك يا جميلة؟؟
وحشانى أوى:)

أكيد طبعا فى فرق بس أنا الحمد لله وصلت للثقة...

Hossam يقول...

heyyyyyyyyy
بجد فرحان جدا اولا عشان وحشتنيى جدا وكنت عايز ازورك وزرتك تانى حاجة عشان لقيتك مبسوطة وفعلا فى تقدم وشىء جديد فى الحياة
احساس جميل انك تحس انك عملت حاجة حتى ولو لنفسك زيك كدة اما اقتنعتنى ان انتى عندك مهارات مش موجودة عند حد تانى والعكس طبعا وبالتالى فى شىء انا اكتشفتة اما قريت بوستكم انهاردة وهو ان عدم الثقة بالنفس شىء مرفوض لان مفيش حد فاشل او متخلف فى كل حاجة فى دنيتة
وحشتنيى بجد صديقتى
تحياتى

شفـقــة و إحســــان يقول...

الثقة بالنفس طبعا شىء مهم جدا للواحد
مع ان كتير مننا بيفتقدها الا زى ما انتى قلتى فعلا
كل واحد فينا فيه مميزات وفيه موهبة كل واحد غير التانى
ولو كل واحد منا بص لمميزاته وامكانياته اكيد هيثق فى نفسه
لكن للاسف اظاهر ان كتير منا مابيبصش الا للعيوب
بوست حلو وهادف
تحياتى