الاثنين، 31 أغسطس، 2009

البوست اللى كنت مستنية انزله من زمااااان :)))

فى ناس عايشة عشان تعيش من غير اى همة
و ناس حياتها تموت تعيش عشان تحيى امة
و دى بداية الاغنية اللى معمولة ل
ABC
إيه بقى يا ستى إيه بى سى ده اللى انتى فلقانا بيه و جبتلنا صداع منه
إيه بى سى ده يا جماعة يعتبر نشاط طلابى زى انشطة طلابية كتير اوى فى جامعة القاهرة بتهدف لانها تعلم الطلبة حجات كتير و تقلل الفجوة بين سوق العمل و الدراسة اللى بندرسها و طلبة هما اللى بيعملوه و بيحولوا كل سنة يكبروه اكتر..بس لأ إيه بى سى مختلف
Advanced Business Community
ABC
اتعمل من سنة 2008 يعنى إن شاء الله 2010 حتكون تالت سنة ليه و فى السنتين اللى اشتغل فيهم قدر يثبت انه اقوى نشاط طلابى تجارى بإعتراف الكل و ده لأن الناس اللى بدأته كان هدفها حاجتين هما:
1- تخلى الشباب شباب عارف يعيش حياته صح بقربه من ربنا
2-تطلع شباب حابب بلده و عايز يخدمها و هو حببها
طبعا الهدفين دول مش معلنين الهدف المعلن هو اننا نشاط طلابى إسلامى هدفنا نخلى الشباب مدركين اكتر بالبزنس و البنوك و المحاسبة و التامين
و إسلامى دى مش معاناها اللى فى دماغكوا خالص معانا يعنى ..فى مثلا التأمين حنهتم اكتر بالتأمين التكافلى الإسلامى و فى البنوك حنهتم اكتر بالبنوك و الإقتصاد الإسلامى..الحفلات بتاعتنا حتكون جامدة و كل حاجة بس مش حيكون فيها رقص و اغانى زى اغلب النشاطات الطلابية..احنا ولاد و بنات آه بس بنتعامل بكل إحترام و مش حنتجاوز اى خطوط حمرا
الهدفين اللى مش معلنين دول اغلبنا حس بيهم كانو دايما طول السنة يكلموا عن تحديد الأهداف و انك لما تؤمن بهدف لازم توصله و تعيشه حتى لو الكل كان معارضك كانو دايما يحسسونا اننا لازم نعمل حاجة للبلد دى مش لازم نقعد نشتم و نقول اى كلام..لا ان اشيل هم البلد و اعيش بيه و اصلح فيها من حتتى
أحمد عادل واحد من 3 اللى بدأوا فكرة إيه بى سى و هما احمد عادل و هاله مخلوف (صاحبة الفكرة الأولى) و إلهام..احمد عادل كان بيقولنا:
البنى آدم فى الدنيا دى نوعين يا شايل يا متشال...يا عايش عشان حاجة و شايل همها و عايز يعمل إصلاح و يصلح ناس..يا هو الهم اللى متشال
و كان دايما يقول يا رب اجعلنا شايلين مش متشالين
و الهدف الأول انهم يخلونا ناس عارفة تعيش حياتها صح و قريبة اوى من ربنا دى لمسناها اوى من غير ما يتكلموا كلمة واحدة عنها..كان الفعل هو سيد الموقف من أول التعامل بين الولاد و البنات فيه و لبس البنات لحد الصلاة اللى بنصليها جماعة مع بعض و نية طلب العلم اللى بتتقال فى أول كل
session
و بعد ما موسم إيه بى سى 2009 خلص جمعوا الناس اللى بجد حسوا انهم عملوا حاجة و انا الحمد لله كنت حد من الناس دى و بدأوا فعلا يكلمونا عن الأهداف دى اننا لازم نكون صورة صح للإسلام و لازم نحس ببلدنا و نخدمه و قاللونا انهم عايزنا نشيل معاهم إيه بى سى و نوصل الفكرة دى للناس..دايما بيقولوا كل واحد يعتبر نفسه واقف على ثغرة من ثغرات البلد و يصلح فيها و على فكرة ده مش كلام و بس دى فكرة كل واحد
ABCian
بيكون مؤمن بيها جدا و فعلا كلنا شغالين على كدة
نتكلم بقى على إيه بى سى من جوة
هو فى 3 اقسام:
قسم اكاديمى
قسم التنظيم
قسم اتش آر
و القسمين الآخرانين دول علشان القسم الأكاديمى لانه يعتبر اهم قسم لانه هو اللى بيقدم التوبيكات و اللى حيتشرح للناس اللى قدمت فيه و دول اسمهم delegates
و قسم الإتش آر هو اللى بيقدم التدريب للموديراتورز اللى المفروض حيشرحوا للدليجتس و بيحط اسأله الإنترفيو للدليجتس اللى متقدمين و هو اللى طول سنة بيتأكد إن ال3 اقسام شغالين صح و هو اللى بيحط التوبيكات اللى حتتشرح مع الموديراتوز..طبعا جوة الإتش آر اقسام كل قسم مسئول عن حاجة من اللى قلتها
اما بقى قسم التنظيم..فا هو ده اللى مسئول عن الحفلات و تنظيمها و هو اللى الناس اللى فيه بتقف قدام الكلية فى حاجة اسمها بوث و بيعرفوا الطلبة إيه هو إيه بى سى و الاقسام اللى فيه و هما اللى بيعملوا البوث ده و بيصمموا التى شيرتس للناس اللى شغالة فيه و بيعملوا الفيديوهات اللى بيعرضوها فى الحفلات و فى طبعا قسم للبى آر اللى مسئول عن التمويل و دول طبعا اكتر ناس بتتبهدل عشان يقدروا يجيبوا المصاريف اللى حتكفى كل ده
القسم الاكاديمى مكون من 5 اقسام الدليجتس بيدخلوا فى واحد منهم
finance council
banking council
business council
e- business council
insurance council
و فى آخر الموسم بيتعمل مؤتمر كبير و بيخلوا ال5 اقسام دول يشتغلوا كأنهم مجتمع واحد فى البنوك و المديرين الماليين و البزنس و شركات التأمين و الدليجتس بيبدأو يشتغلوا على الاساس ده و الموديراتوز بيشرفوا على شغلهم و الإتش آر بيبقوا هما الحكومة و البنك المركزى
و بنقعد 3 ايام على كدة و فى يوم قبليها كل قسم بيشتغل لوحده بتوع البزنس بيعرضوا مشروع هما عملوه..و البنوك بيعرضوا خدمة جديدة إسلامية البنوك ممكن تقدمها و هكذا
انا عارفة انى طولت عليكم بس إيه بى سى اتعلمت منه حاجات كتير اوى و تجربة مهمة جدا فى حياتى مكنش ينفع مكتبش عنها
و أنا دلوقتى بعد ما بقيت دليجت بقيت دلوقتى فى الإتش آر فى القسم اللى بيساعد الموديراتوز انه يحطوا التوبيكات و بيعملوا الإنترفيوز معاهم و لما الدليجتس بيدأو شغل بنبتدى نقيم الدنيا ماشية إزاى
و دى تكملة الاغنية :
فى ناس عايشة عشان تعيش من غير اى همة
و ناس حياتها تموت تعيش عشان تحيى امة
يا دنيا مهما عملتى فيهم مهما حاولتى توقفيهم
عمرهم ما يقولوا لأ لحلمهم
من زمان بنقول يا ريت فى كل حتة و كل بيت كل واحد بدأ طريقه يكمله
و لازم نفكر كل واحد حس يوم انه نسى
حلم و بدأناه كلنا..حلم إيه بى سى

هناك 19 تعليقًا:

mohamed ghalia يقول...

حلو أوى الموضوع بجد
كان عندنا هنا فى بنها برده مجموعة ميرف وصافى بس للأسف عشان رابعة كانت سنة رخمة فمقدرتش أعمل اى حاجة معاهم
بالتوفيق إن شاء الله
يلا عايز اشوفك كده مدربة اتش ار كبيررررررررررررررررررررررررررررة

انا ودماغي يقول...

D:

يااااااااااارب

بس متهيألى ان ممكن برضه ناس متخرجة تشتغل فيه برضه شوف كدة
:)

شمس النهار يقول...

الموضوع ده انا قريت عنه وكنت سعيده جدا انه اتعمل بس يارب يكمل علي خير ومايموتش زي اي حاجه تانيه
والتجربه لسه مبتديه وانا قعدت مع شباب الخرجين اللي اخدوا الكورس الاول علشان همه اللي يدرسوه لطلبة الجامعه لاقيتهم متحمسين جدا وماشاء الله من خيرة شباب البلد

شمس النهار يقول...

عايزه ارد علي محمد غاليه يامحمد الموضوع مبني علي ان همه بيجيبوا خرجين اصلا وبيدوهم دوره بعد مابيكونوا عدوا مجموعة اختبارات تقول ان الخريج ده كويس ومؤهل انه لو اخد الكورس ينفع يدرسه لطلبة الجامع
وتقريبا مدته من 6 الي 3 شهور حسب قدرات الدارس اللي هيدرس
بس اللغه شرط اساسي
ممكن تقدم بما انك خريج انك تدخل امتحان تحديد قدراتك وان شاء الله تنجح وتاخد الكورس وتدرسه وربنا معاك

انا ودماغي يقول...

هو فعلا الخرجين ممكن يكونوا هما اللى بيدرسوا

بس هو اللى انا اعرفه إن إيه بى سى لما اتعمل كانوا اللى عملوه هما طلبة فى سنة رابعة و اللى مسموح بيه للخرجين هو انهم يشرحوا غير كدة كله بيبقى طالبة..و الدليجتس كمان ممكن يبقوا خرجيين..بس ده ميمنعش ان فى موديؤاتوز طالبة لأن انا كان عندى 4 موديراتورز 2 طلبة و 2 خرجيين

ABOALI يقول...

جميل تلك ذلك التنظيم الملتهب بالحماس والذكاء
نحتاج دائما لمن لديه القدرة على صنع نفسه وتنمية قدراتها من خلال تحديد هدف ووضع الخطة للوصول اليه مع وجود الاصرار

بالتاءكيد ما ذكر فى البوست شيىء يدعو الى التفاؤل والنظر بنظرة مختلفة فى الحياه

ولكن ما ينقصنا هو الاستمرارية والمواظبة وتتطبيق ما يقال


الفجوة اللى موجودة حالياان قدرة اقناع البيئة التى حولنا فى معظم الاحيان اقوى ممن ندعو اليه فيحدث الانفصال وهبوط العزيمة


ولكن من خلال البوست ارى ان مجرد الفكر وتنفيذه يعتبرى بارقة امل رائعة

باءن القادم اجمل ان شاء الله


تحية منى لك ولكل من يفكر بتلك الطريقة

رمضان كريم

أحمـــــــــــــد أبو العلا يقول...

الفكره جميله جدا
وان شاء الله تستمر بالنجاح

الجميل الأسلوب اللي بتكلمي عنه
اسلوب اثبات الهدف بشكل عملي من غير مايكون فيه نصيحه مباشره ممكن ناس تنفر منها

ربنا يوفقكم

آلام وآمال يقول...

روعة

ربنا يوفقكم ويحققلكم كل امانيكم وكل الناس اللي مهتمة انها تفيد وتستفيد

النماذج دي واللي زيها بس هما اللي هيقدروا يغيروا الواقع للأفضل

الشنكوتي الكبير يقول...

كل سنه وانتي طيبه رمضان كريم
سلاااااااااااااام
اخوكي ايهاب

عاشقة الأحزان يقول...

بخخخخخخخخخخخخخ

انا جيت وحشتنى ياقمر اخبارك ايه ربنا يوفقكم ويحقق ليكم كل ما تتمنو

كل سنه وانتى طيبه

مودتى
ايناس

دموع القمر يقول...

اول زيارة ليا فى المدونة

بجد موضوع حلو تحياتى لكى

ويارب الفكرة تستمر بنجاح وتوفيك

كل سنة وانت طيبة

blue-wave يقول...

بجد برافو
يلا شدى حيلك بقى:))

Sharm يقول...

بوست مفيد جدا

شكرا

كيكى عوووووو يقول...

جامد اوى شكلة الموضوع دة ودة بس للجامعات الحكومية ولا ايه؟؟؟ ليكوا انتوا بس صح

كيكى عوووووو يقول...

فى لقاء تانى يوم الاحد الجاى ع فكرة

Ms3a_miso يقول...

اللي لفت نظي لمدونتك ان هي الخالق الناطق نفس اسم مدونتي السريه الي بكتب فيها الاغاني اللي بأذن واحد احد عاجلا ام اجلا حبيعها :D :D

mahasen saber يقول...

برافو عليكى يا اميره عاجبنى ان دماغك موجهه فى العلم برافو يا حبيبتى

ربنا يوفقك دايما

طوبه فضه وطوبه دهب يقول...

ربنا يارب يوفقه اى فكر او هدف محترم كل سنه وانتى طيبه ياقمرايا

انا ودماغي يقول...

مرسى ليكم على ردودكم دى بجد