الأحد، 26 يوليو، 2009

البنات تقلع براحتها و محدش يفتح بقه

حتكلم فى موضوع يمكن يكون قديم شوية
بس افتكرت انى عايزة اتكلم فيه لما و انا بحول كدة و بتفرج على التلافزيون و لقيت مسلسل قضية رأى عام و انا بصراحة بحب المسلسل ده
قلت اما اتفرج و كانت اكتر حلقة فرستنى ..هى مش الحلقة كلها لكن جزء فى الحلقة
و هذا نصه
الاخت يسرا واقفة فى جمعية نسائية و لا حاجة كدة و الجمعية دى مفيهاش غير راجل واحد و مطلعينه متدين
و كعادة الرجال المتدينون فى السينما و التلفزيون لازم يطلع ضيق الافق بيتكلم بصوت عالى بيقول آراء غلط و لا يتحدث سوى اللغة العربية الفصحى
فالراجل ده طلع بيقول للحاجة يسرا فيما معناه:
إن الإغتصاب كتر اليومين دول عشان اللبس العارى للبنات
راحت يسرا ردت و قالتله فيما معناه برده:
بطله تخلف بقى ما هو فى امريكا عريانين و مش بيحصل كدة
(يعنى من الآخر احنا نقلع براحتنا)
بس الاستاذ السينارست و الاستاذة يسرا اتعملوا مع الموضوع على طريقة
(لا تقربوا الصلاة)
و مكملوش الآيه
هما فى امريكا مفيش إغتصاب كتير لأن العلاقات الغير مشروعة اسهل عندهم من شرب المية و التيك أواى
الواحدة لما توصل لعشرين سنة و هى لسة عذراء بيبقى فيها حاجة غلط و محدش بيحب يقربلها و بيعتبرها مش طبيعيه
يعنى اديكوا مثال مثلا:
لما انت كل ما تجوع تلاقى اكل انت بتحبه و تاكله و معندكش مشكلة..هل ممكن تفكر انك تسرق اكل ؟!!!
نفس الحال فى أمريكا..المفروض اصلا ميكونش عندهم إغتصاب مش النسبة تكون قليلة
انما هنا فى مصر
مش محتاجة اقولكم ان الوضع مختلف
نفس اللى حصل مع الاخت منى زكى لما كانت طالعة فى برنامج و بتتكلم عن فيلمها العظيم و بتقول اصل كل ما واحدة يتم إغتصابها يقولك اصل لبسها
انا مش فاهمة هى الناس دى عايزة إيه...عايزة البنات تقلع و الولاد متبوصش عشان كدة عيب
أديكوا مثال تانى قبل ما اوصل للب الموضوع و اللى انا عايزة اقوله
دلوقتى أنا و انت وانتى لما بنكون صايمين و بنلاقى إعلان فى اكل او شرب مش بنحول عشان منفتكرش اننا جعنين و عشان منتعبش اكتر
صح ولا لأ؟!!!
طب دلوقتى فى ظل الحالة اللى احنا فيها دى ..مفيش شغل مفيش شقة مفيش جواز مفيش فلوس و مفيش فايدة (عكس امريكا تماما)
ناقصة هى بقى البنت تبقى ماشية اللى هى لابساه قلته احسن
انا من هنا بقول ان لبس البنات سبب مهم اوى من اسباب الإغتصاب و مش الوحيد عشان محدش يقولنى كلام
طب يجى حد و يسألنى..طب ما فى واحدة منتقبة و بتتعاكس و ممكن يتم إغتصابها
حقولوا دى مش القاعدة أبداااا..
و على العموم
انا متأكدة إن لو واحدة منتقبة و تم إغتصابها فده بيكون نتيجة ترسبات كتير اتعرض ليها المغتصب و جت فى المنتقبة
لكن محدش يقنعنى ان واحدة تيبقى ماشية ساترة نفسها و حد يشوفها فيفتن و يغتصبها ..
و مش زى ما واحدة لطيفة طلعت فى برنامج لطيف و قالت كلام لطيف ألا و هو :
الممنوع مرغوب و اللى بتغطى بتفتن اكتر من اللى معرية
و حدى نفس المثال بتاعنا و احنا صايمين
لما نبقى صايمين و فى اكل مكشوف و اكل تانى متغطى و مش عارفين ده إيه
مين اللى حيجوعنا اكتر؟!!
سيبالكوا الإجابة...
فا انا من هنا بقول بطلوا بقى كلام فااااااااااااارغ
طبعا لبس البنت العريان بيجنن الشباب و من كتر اللى هما بيشفوه فى الشوارع بيدفع الناس الضعيفة منهم انهم يلجأوا للإغتصاب
كفاية بقى غلط فى كل حاجة ربنا أمر بيها ..حرام عليكوا احترموا ربنا شوية و احترموا تعاليمه..ده لو مديرك فى الشغل حتعمله إعتبار أكتر من كدة
اتقوا الله..إيه يعنى عايزين البنات تبقى ماشية قالعة و الولد اللى يعاكس و لا يغتصب يبقى غلطان من ساسه لراسه و البنت يا عينى هى اللى غلبانة اللى بتعانى من قهر المجتمع..
انا مش بدافع عن المغتصب ابدا..لان غير الإعدام مينفعش ليه..
بس ياريت الموضوع يتبصله بموضوعية شوية ..لان اغلب الاوقات بتكون البنت شريكة فى الجريمة

هناك 73 تعليقًا:

ABOALI يقول...

اول تعليق

كلام عاقل جدا و محترم

واتى الكلام بعد لما فاض الكيل

واعتلى منابر التنوير فى المجتمع الفنانات
والعواهر ومدعى الدين

واتفق معاكى

ساعات الفنانين وناقصى العاقل يطلعوا كذبة وكل ما ازدادو ا فى ترديدها

صدقوها وهذا م حصل

بس هاقول ايه بقى فى تانى تعليق

هانشوف

ABOALI يقول...

بمناسبة هانشوف

بيقولوا حسنى مبارك راح يزور حديقة الحيوان

وكان المدير بيشرح ليه فى بيت الزواحف

فوقف امام سحلفاة وقال المدير دى سلحفاة يا فندم معمرة ساعات بتوصل 130 سنه

فرد عليه حسنى وقال يااااااااااااه

130 سنه خلاص هانشووووووووووووف


هههههههههههههه

وده طبعا على اساس انه ناوى يعمر اكتر منها


الهلس وراء اطعام كل الشهوات بدون النظر عن صحة الجرى او لا

مع التستر وراء قوانين مصطنعة بدون النظر اننا معنا مهنج من السماء

بيعطى الفرصة لانعدام القيم

وجودك يا انا ودماغى واعطاء تلك الامثلة

يعطى ابواب كتير من الامل اننا لسه بخير وفى عائلات بداءت تدرك انى الطريق لازم يصحح

باحيى فيكى احترامك لنفسك وانك جوهرة والجوهرة دايما غاليه وتصان

بوست مميز لشخص رائع


مش عارف الكلام ده خرج ازى منى

بس يظهر انتى شربتنى شاى بالياسمين

خالص تقديرى

طوبة ذهب وطوبة فضة يقول...

mshklet elaghtsab de mshklet bnt wwlad wdlad kamla m7taga la3adt tfker fkol shyaa m7taga trd llansan adameto wansaneto wb3dha t7sbo 3la af3alo klam gmel wray agml

انا ودماغي يقول...

ABOALI...

ههههههههههههههههه
حلوة النكتة دى بس ياريت متتقلش هنا فى المدونة منعا للى بالى بالك

اللهم بلغت اللهم فاشهد

و ربنا يكرمك على الكلام الحلو ده بس انت اكيد غرقت فى بحر شاى بالياسمين عشان تقول تعليق من غير تريقة واحدة لشخصى

انا كدة حقفل المدونة و اعتزل و كفاية بقى :)

انا ودماغي يقول...

طوبة ذهب وطوبة فضة ...

معاكى حق يا جميل
و انتى اللى اجمل :)

كيــــــــــــارا يقول...

معاكي حق بس بجد ياميرو في محجبين كتير ولبسهم محترم وبيتعاكسو ومش بقت حاله فردية

ahmed_k يقول...

أنا طبعا بتفق معاكي تماما في أغلب ما ذكرتي
أما بخصوص السينما ونجوم السينما فطبعا متوقع منم هذه الردود وهذا الإفساد
فهم المفسدون في الأرض وهم من أسائوا لمصر الأزهر وحامية السنه
فالعيب لما يطلع من أهل العيب ميبقاش عيب
وبخصوص أمريكا عايز بس أصحح معلومه
أمريكا من أكثر بلاد العالم إنتشارا لظاهرة الإغتصاب الجنسي ومعلوم أنه في الولايات المتحده يتم إغتصاب أنثى كل 5دقائق تقريبا رغم الإنحلال الذي يعيشه المجتمع فيها
أما مصر ورغم التشدد في العلاقات بين الجنسين بدون رابط شرعي ورغم الظروف الإقتصاديه الغير معينه على الزواج تقل فيها النسبه عن دول غربيه بشكل واضح جدا ولله الحمد وإن كانت بدأت في الزياده هذه الأيام كتحرش وليس إغتصاب بمعناه المعروف فالسبب الأول والأخير هي السينما الهابطه التي تتفنن في نشر العري وثقافة الإنحلال والكليبات الخليعه,
نسأل الله أن يحمي شبابنا وبناتنا من تلك الحمله الشرسه التي تهدف لإنتزاع كل قيمه منهم
وتقبلي مني خالص التحيه والتقدير

انا ودماغي يقول...

كيــــــــــــارا...

اكيد يا كيارا لأن خلاص الموضوع بقى عاطل على باطل من كتر اللى الشباب شايفه

انا ودماغي يقول...

ahmed_k...

بجد انا مكنتش اعرف المعلومة دى انا كنت فاكرة انه زى ما اتقال فى المسلسل...حتى دى قايلنها غلط..بجد حسبى الله و نعم الوكيل

و اكيد طبعا اللى اتذكر ده هو السبب بس انا مكنتش عايزة ادخل فى الحاجات دى لأنى عارفة انى حلاقى تعليقات ملهاش لازمة و كنت عايزة اركز اوى على ان لبس البنت له سبب كبير اوى فى اللى بيحصل ده

Sweet Violet يقول...

انا عموما برفض اننا نقارن نفسنا بالغرب و نقول اشمعنا

و معاك ان البنت شريكة فى الجريمة

بس هنا انتى بتقولى ان المنتقبه بيتم اغتصابها لان ده نتيجة لترسبات

طب تعالى نشوف المثل بتاعك احنا دلوقتى هنحول القناة علشان مش نفكر فى الاكل
يوم اتنين تلاته .. بس احنا رغم كده بنفضل صايمين الشهر كله
الام بتدخل المطبخ و هى صايمة بتعمل الاكل
ليه بقى ماحدش فينا فطر لو هى المسألة هتكون ترسبات ليس الا

انا هنا مش بشجع على اللبس الغير محتشم
لكن انا ارفض ان يكون السبب الرئيسى هو لبس البنت

romansy يقول...

الموضوع مش فى اللبس بس الموضوع اخلاق كمان
احنا مش بنقول نقاب احنا بنقول لبس محترم بس
دا كل المطلوب
اكيد فى الجامعات فى لبس اوفر قوى قوى
بس برضه اكيد مليون الميه فيه ناس محترمه جدا
يعنى عندنا كده كده
ربنا يهديكوا يارب
ويهدينا معاكو

Nabil يقول...

السلام عليكم...

كلام مظبوط جدا المشكله ان اللى صوتهم مسموع وطافيين على السطح فى مجتمعنا وبيعتبروا المثقفين واللى بيتاخد رايهم

استمدوا ثقافتهم وتعليمهم من التمثيل لا اكثر ولا اقل

واحد وواحد متعلموش ولا اتثقفوا ولا يفهموا حاجه غير انهم مشهورين لانهم بيضحكوا الناس بقوا بيفتاو فى امور العامه
دى كارثه حقيقيه

تانى حاجه هو موضوع اللبس ده طبعا مؤثر جدا زى ما قلتى بالظبط

بس زى ما ربنا سبحانه وتعالى امر البنت تتستر فى كل الاحوال امر الشاب يغض البصر فى كل الاحوال برده

يعنى هى لم تكون لابسه لبس مكشوف مش دافع ليه كده يبقى حيوان

وفى نفس الوقت مينفعش نقول تلبس اللى هى عايزاه وهو اللوم كله عليه

عشان الموضوعيه هى لازم تكون محتشمه جدا وهو محترم جدا لانه لو سافل وانعدمت عنده القيم صدقينى مش هتفرق معاه حتى لو كانت منقبه
لان الموضوع بقى احترافى مش معتمد على الضحيه ده طبعا مش فى كل الحالات

المخرج من الازمه بسيط جدا

الطرفين لا يتعدوا حدود الله ولا هى تقلع ولا هو يبص .

EMMY BABY يقول...

ايه العقل ده كله يابت يا اميرة هههههههههههههههههه

انا عايزة اقلك ان انتى هتقولى لبس وحد هيرد يقلك اخلاق وحد هيرد يقلك الشباب

بس والله هى فعلا جريمة مشتركة بين كل الاطراف دى لو مفهاش ركن منهم مش هتم

لو واحدة ماشية لابسة ايه وهو انسان بيتقى ربنا مش هيعمل كدة ولو هو حد وحش ايه والبنت ماشية محترمة فى وقت محترم بلبس محترم عمر ماده هيحصل

ربنا يهدينا جميعا

تحياتى

ايمى

mohamed ghalia يقول...

العلم والفهم ده نعمة من عند ربنا
أكيد كل مشكلة ليها أسبابها
فى مشكلة زى موضوع التحرش وما على شاكلته
أكيد الإتنين غلطتين
البنت الى ملتزمتش بلبسها
والولد الى مش بيغض بصره واحنا كلنا مأمورين بكده
التوبك هايل متفق معاكى تماما

أحمـــــــــــــد أبو العلا يقول...

يسرا وعادل امام ووحيد حامد
هيا ديه دايما سياستهم
يطلعوا الارهابي والمتخلف والأهبل هوا الشخص بتاع الدقن واللي لابس عمه
حسبنا الله ونعم الوكيل فيهم (والله بقولها من جوووووووه قلبي)

المغتصب اللي يفكر في الاغتصاب حكمه في الدين واضح وصريح, وانا بفرح جدا لما اعرف انه اتعدم عشان يكون عبره
الاغتصاب ملوش مبرر يديله الحق في الاغتصاب
لكن الظاهره (وفي فرق هنا شاسع) ليها اسبابها وواحد من اسبابها اللي انتي قلتيه

يعني لما ندرس اسباب الظاهره يبقى عايزين نعالجها مش زي ماهما بيقولوا اننا بنبرر الفعله ديه

الكلام العاقل ده مينفعش غير اننا نحترمه ونشجعه ونمشي وراه

ربنا يكرمك انتي ودماغك

بسنت صلاح الدين يقول...

كلامك مظبوط سبب رئيسى العرى المنتشر،لكن مش سبب وحيد ،عندك المخدرات و الاستهانه بالدين من الشباب و الرجوله والشهامه اللى اترحمنا عليها من زمان

انا ودماغي يقول...

Sweet Violet...

هو انا مش بقول انه السبب الرئيسى و اكيد طبعا المحترم بيفضل محترم ..لكن لو هو حد مش محترم اوى ممكن يتهز من اول وقعة و انا قلت إن لبس البنت سبب كبير جدا و اكيد هو كدة بس طبعا هو مش الوحيد و فى اسباب كتير جدا

انا ودماغي يقول...

romansy..

ولا انا كمان بقول نقاب..انا بس اديته مثل

و ياريت فعلا كل واحدة تحترم حرمة جسمها وتغطيه

انا ودماغي يقول...

Nabil...

كلامك صح جدا و فى الجون
و للآسف فعلا اللى بيعبروا عننا و بيصلولنا معلومات لا هما مننا و لا عاجبنهم تفكيرنا و لا بيحترموه

ربنا يزيح عننا

انا ودماغي يقول...

EMMY BABY..
جرى إيه يا بت يا إيمى..ما انا طول عمرى عاقلة و بخر عقل (وش بيطلع لسانه)

اكيد معاكى حق..بس ممكن واحد برضه يبقى عادى لا هو محترم و لا هو مش محترم و يشوف البنات و يبدأ يقل ادبه

انا ودماغي يقول...

mohamed ghalia...

معاك حق يا محمد فى كل اللى قلته و انا كمان متفقة معاك تماما

انا ودماغي يقول...

أحمـــــــــــــد أبو العلا ...

مرسى ليك يا احمد على تشجيعك ده

و فعلا الاسماء اللى ذكرتها دى حسبها حيكون كبير اوى دنيا و آخرة..و انا متأكدة انهم حيكونوا عبرة

انا ودماغي يقول...

بسنت صلاح الدين..

و الله يا بسنت معاكى حق

احنا اترحمنا على الحاجات دى بدرى

waiting يقول...

السلام عليكم ورحمة الله

بارك الله فيك عزيزتي على الكلام الطيب
واسأل الله ان يجعله في موازين حسناتكم

ما مفهموم التخلف يا يسرا ؟؟
يا من عرضتي نفسك أمام الناس عارية
وفي مشاهد خليعه

ونسيتي يوم العرض
نسيتي قوله تعالى :

( وَعُرِضُوا عَلَى رَبِّكَ صَفًّا
لَّقَدْ جِئْتُمُونَا كَمَا خَلَقْنَاكُمْ أَوَّلَ مَرَّةٍ
بَلْ زَعَمْتُمْ أَلَّن نَّجْعَلَ لَكُم مَّوْعِدًا )

لا حول ولا قوة إلا بالله

MǿиY El-Shreef يقول...

هو ده الكلام

والله انا زيي زيك بتغاظ اوي من الناس دي ومنطقهم غريب جدا

برافو عليكي يا ميرا

متفقه معاكي ف كل كلمه :)

حاسوباتيه يقول...

والله كلامك تمام دول اصلا مش يسرا وبس اي حد يكلم عن الموضوع ده يقولك العري مش هو السبب وفعلا كلامك هو الصح احنا مش زي بره لان هما عندهم الزنا عادي جدا لكن احنا لا

والله العظيم انا لما بشوف بنات لابسه ضيق او كده انا نفسي بكسفلهم سلف انا ماعرفش الدم راح فين ماعرفش بصراحه والله بشوف مناظر مقززه بجد

ربنا يهدي الكل يارب ونبطل كلمه العري مش السبب

فرفشة الوان يقول...

في البدايه ربنا يهدي الناس بس انا مختلفة في شي في بنات كتير محترمة بس الرجل هو اللي وحش وانامش هقول انا كل البنات ملاك بس في الاخر ربنا يهدي الناس

funky girl يقول...

بجد معاكي جق في كل كلمة التيها و اكيد لبس البنت ليه دور كبير بس برضوا زي مالبنت مفروض عليها تتحجب و تلبس لبس محترم الولد كمان المفروض يغض بصره انا عارفة ان اكيد البيغتصب داه غض البصر داه عنده ولا اي حاجة فعشانكدا بيعمل كدا
بس فعلا لبس البنت مهم اوي

احساس طفلة محبة للرومانسية بس واقعية يقول...

موافقاكى جدا فى كل كلامك
لان بالتاكيد مش هيكون تغير البنات مش بيأثر على المجتمع
لكن تغير الشباب هو اللى بيأثر وبيأدى للاعتداءات اللى بالشكل دا

تحيايتى ليك على البوست دا
مهم وبيعكس وجهة نظر انا متفقة معاها وشيفاها صحيحة 100 % من كل الجوانب

تقبلى مرورى

blue-wave يقول...

والله لو كل البنات فكروا زيك كدا مكناش هانشوف المساخر اللى بتحصل اليومين دول

عاشقة الأحزان يقول...

السلام عليكم ورحمة الله وبركاته

سعدت بمرورك الكريم وان شاء الله يبقا التواصل بيننا

بجد موضوع جميل قووى احيك عليه من كل قلبى

ربنا يهدى بنات وشباب المسلمين امين يارب

تحياتى
ايناس

قلم رصاص يقول...

السلام عليكم ورحمة الله وبركاته

فعلا اختي الكريمة حضرتك اتكلمتي في نقطة في غاية الأهمية

البنت لها دور قوي جدا في اغراء الطرف الاخر بالتعدي على خصوصيتها سواء بالمعاكسه او اشياء اخرى والعياذبالله
فانا استحي ان اذكر لفظ اغتصاب

بيبوظ لي اعصابي لأنه عمل شيطاني

المهم

انا عجبني جدااااااا الدليل اللي انتي قولتيه للاستشهاد بيه ، وهو :

"لما انت كل ما تجوع تلاقى اكل انت بتحبه و تاكله و معندكش مشكلة..هل ممكن تفكر انك تسرق اكل ؟"

فعلا والله كلام عقلاني جدا

ومثل بليغ بالفعل

أصبتي كبد الحقيقة في مقتل اختي الكريمة

ففن التمثيل بكل أسف أثاره السيئة اكثر من ايجابياتهع ونفعه اقل من ضره

والاسلام لم يحرم علينا شيئا الا وكانت لحكمة ولخير للبشر

فلما حرم الله تعالى الخمر كان الهدف ان يصون الانسان من السكر

ولما حرم لحم الخنزير فكان الهدف الحفاظ على صحة الانسان

ولما حبب الحجاب والنقاب فكان الهدف هو صون لبنات المسلمين حتى لا يكن فتنه للشباب للوقوع في المعاصي

وليس كذلك فقط وانما حفاظا على البيوت العامرة ، فإن رأي زوجا امرأة جميلة تمشي في الشارع .. قطعا عندما يذهب للمنزل ويرى زوجته مهما كانت جميلة او ليست بجميلة قطعا سيتغير فكره تجاهها او تتبدل مشاعره او تهتز علاقته بها الخ الخ

القصد باختصار ان الحجاب واللبس المحتشم لم يفرض على المسلمة لمجرد تزمت او تمسكا بشيئ لهوى في نفس احد ، وانما له هدف جوهري وهو صون مكارم الاخلاق وصيانتها والحفاظ عليها

موضوع متميز جدا بجد

بارك الله فيك ولك

وطيبتم وطاب سعيكم وممشاكم

حـــلـــم كــــان يقول...

والله ياجماعه اللى بتلبس كويس ده لربنا اوى وكمان عشان تحترم نفسها اى حد مش حكايه اغتصاب ومش اغتصاب

micheal يقول...

مع إحترامي لكلامك..أنا برضه مقتنع بوجهة نظر شخصية..أنا حتي لو البنت لابسة بكيني..أنا ماليش دعوة وحمشي في حالي ومش حتحجج بأي ظروف مهما تكن
وعندك أنا مثلا واحج ظروفه من أسود ما يمكن..فهل ده يعطيني الحق للمعاكسة والاستظراف والجري ورا البنات اللي لابسيين ضيق في الشوارع
؟
تحياتي

انا ودماغي يقول...

waiting...

اللهم آمين

شكرا ليك

انا ودماغي يقول...

MǿиY El-Shreef....

ربنا يخليكى ليا يا مونى

انا ودماغي يقول...

حاسوباتيه...

و انا كمان و الله..يا بنتى ده اللبس ده انا مقدرش البسه فى بيتنا :)

انا ودماغي يقول...

فرفشة الوان...
أكيد طبعا..بس لان الكل اتكلم فى الموضوع ده..فأنا حبيت اورى الوجه التانى من العملة

انا ودماغي يقول...

funky girl...

معاكى حق يا فانكى :)

انا ودماغي يقول...

احساس طفلة محبة للرومانسية بس واقعية...

مرسى ليكى يا قمر

انا ودماغي يقول...

blue-wave...

أتمنى بجد انها تخلص

انا ودماغي يقول...

عاشقة الأحزان...

اكيد إن شاء الله لازم يكون فى تواصل :)

انا ودماغي يقول...

قلم رصاص...
بجد تعليق قمة فى الروعة

شكرا عليه :)

انا ودماغي يقول...

حـــلـــم كــــان..
اكيد طبعا بس انا ركزت على حاجة كل من هب و دب و ملوش لازم بيتكلم فيها و يقولك اللبس مش مهم

انا ودماغي يقول...

micheal...
احييك على رأيك ده بجد لانه يدل انك إنسان محترم

و انا مديتش لحد الحق انه يعاكس او يستظرف لأنه اكيد لا يجوز بس برضه لما بيعمل مش حجلده هو لوحده و أقول على البنت مسكينة..لانها هى اللى اديته الفرصة يعمل كدة ..مينفعش البنات متحترمش نفسها و تطالب الولاد كلهم انهم يحترموا نفسهم لان البنات نفسها بايعة القضية..و بعدين الناس خامات و مش الكل محترم و حيمشى فى حاله لما يشوف حاجة مش لطيفة

MaNoO يقول...

كلا منطقى جدا جدا واراى احترمه لان فعلا لبس البنات سبب من الأسابا وبرده مش هنقول كل الاسباب لكنه سبب رئيسى جدا ومينفعش نتجاهله واما واحدة زى يسرا تقول رايها او واحدة زى منى ذكى تقول رايها يبقى الطبيعى اننا نتجاهله لو عايزين فعلا نحافظ على مجتمعنا اكتر من كدا ونواجه نفسنا بالواقع مش نكدب ونلف وندور واذا كان فى محترمين بيتعاكسوا يبقى دى مجرد حالة واحن اتفقنا ان فى اسباب تانية كتير زى ثقافة الشعب وحال البلد والناس ولازم ناخد بالنا من الحاجات دى
تقبلى تحياتى وتقبلى اول زيارة للمدونة واتمنى التواصل

موناليزا يقول...

متفقة معاكِ جدا
وفكرتينى بمقولة استفزتنى برضه كنت بقلب فى التليفزيون فسمعت "علا غانم" بتقول للمذيعة بيعيبوا على لبسى وبيقولوا عليه قصير ده انا كنت لا بسة جيبة عند الركبة فين القصير ده!!!!!

maiosha يقول...

للأسف الكلام كتر فى الموضوع ده جدا جدا جدا .. وللأسف برضه إن الكلام اللى بيتسمع بيبقى الكلام التافه المتخلف زى كلام يسرا واللى زيها
علشان ده اللى هيعجب الأغلبية

كلام جميل ومتزن وأمثلتك طبعا واضحة وضوح الشمس

بس للأسف مين يسمع؟؟؟!!

sendrlla يقول...


الأول ازيك وعامله ايه
ثانيا بجد وحشنى موضوعاتك وكلامك
ثالثا بقى تعليقى
بصى انا ليه رأيين
اولا انا معاكى فعلا
ثانيا برده ما ينفعش علشان هما مش مغطيين شعرهم يغتصبهم الحيوانات ومش معنى ان الواحدة ماشية بشعرها تبقى بنت مش كويسة والناس تستغل دا
هو اه الحجاب بيحفظ البنت طبعا وكل حاجه بس برده دى نقطة تانية خالص اصل دى واحدة دكتورة محترمة لا عرى ولا هى عاهرة ولا أى حاجه
وبعدين صدقينى مسألة الاغنصاب بعيدة تماما عن الحجاب والعرى الكلام دا بدليل اننا بنلاقى بنات محجبة وبنات صغيرة جدا أطفال وبيغتصبوا
يسرا دى بقى سبيكى منها وهى منى ذكى كممثلات لأنهم عاهرات اصلا
....................
رضوى

لاسع افندى يقول...

انا شايف ان الموضوع محتاج دراسه جاده تتناول جميع وجهات النظر قبل فوات الاوان


تحياتى

حسن مدني يقول...

الحقيقة كلام من ذهب، وجميل جدا مثال الصوم وإعلانات الأكل.

ولكن الخدعة في الموضوع هي الاستدلال بدليل غير صحيح. في أمريكا لا يحدث ذلك. هذه العبارة لا علاقة لها بالصحة. فبرغم سهولة العلاقات غير الشرعية هناك إلا أن نسبة الاغتصاب في أمريكا كبيرة جدا، وعدد حوادث الاغتصاب عندهم أكثر بآلاف المرات منها في مصر.

تحياتي

شبــ اون لاين ـــاب يقول...

السلام عليكم ورحمة الله وبركاته

اولا ازيك اخبارك ايه يا رب تكونى بخير

بوست جميل جدا

وفعلا البنات جزء كبير من ده

وبيسموه حريه شخصيه

ربنا يستر علينا فى السنين اللى حايه

فى رعايه الله

joker

انا ودماغي يقول...

MaNoO ...

لا غبار على تعليقك
انت تقريبا لخصت البوست فى كام سطر

تحياتى

انا ودماغي يقول...

maiosha..

ميوشا حبيبة قلبى

إيه يا بنتى فينك

و الله معاكى حق..مين يسمع فعلا

ربنا يهدى

انا ودماغي يقول...

sendrlla...

اكيد طبعا
هو انا اديت المثال على واحدة منقبة بس عشان اكون جبت آخر حاجة

بس انا لا يمكن اقول ان واحدة مش محجبة بس لبسها محترمة انها وحشة..انا بتكلم على البنات اللى لبسهم زبالة و بما فيهم المحجبات برضه و عن دفاع يسرا عنهم

تحياتى و يارب تكونى احسن دلوقتى

انا ودماغي يقول...

لاسع افندى...

ياريييييت

انا ودماغي يقول...

حسن مدني ...

انا برضه لسة عارفة المعلومة دى من ahmed_k و بجد مستغربة اوى ليه العملية دى منتشرة كدة

انا ودماغي يقول...

شبــ اون لاين ـــاب ...

اللهم آمين

انا بخير يا جوكر الحمد لله

نورتنى بزيارتك الاولى و يارب ما تكون الاخيرة :))

princess يقول...

بصى انا موافقكى بس انتى نسيتى حاجة مهمة فى حالات بتبقى البنت فى حالها وكويسة وبرده بتعرض لمشاكل لان مثلا الطرف التانى عنده اضطراب نفسى او بيكون متعاطى حاجة
بس طبعا بقية الحوار كله صح
وربنا يهدى الجميع

اقصوصه يقول...

اكيد معاك حق

تدوينه مهمه

وطرح مفيد

تقبل مروري

بنوتة مصرية يقول...

عادى جدا
العرى وقلة الادب بقا على المكشوف
للاسف دى حاجة تحرق الدم
المفروض ان كل واحد فينا يراعى ربنا فى لبسة ومايديش فرصة لاى ولد ان يتحرش باى بنت
لكن البنت عايزة تلبس ع راحتها وخلاص
مع انى بردة بشوف بنات ملتزمات جدا والله
وشباب بيتعرضولهم
للاسف الكارثة انة مش باللبس بس
تقريبا الشباب بتخاف من البنات الى قالعة لانهم بنات ماتختشيش وممكن يشتموهم فى وسط الشارع
وبيروحوا للبنات المحترمة

شمس النهار يقول...

اااااااااازيك
جيت اسلم واقول وحشتيني
لاقيت قضيه
طيب اشمر بقا واتكلم

اولا ان مافيش اغتصاب في امريكا ده كلام غلط
انا اهو عندهم ونسبة الاغتصاب عندهم بالنسبه لعدد السكان كبيره جدا جدا

دي حاجه

كمان الاغتصاب هنا اغلبه بيتبعه جريمة القتل والتنكيل

كمان هنا في برنامج مخصوص للبنات الحامل في سن اقل من 16 سنه عامل زي استار اكاديمي كده بيعيشوا معاها التجربه لحد الولاده
وغالبا بتعرضه للتبني
اللي هو حرام وخلط للأنساب
امريكا مديانا اللي هي عايزه تديه من معلومات
المجتمع هنا غير المسلسلات والافلام خالص
مش كل حاجه تمام زي مااحنا فاكرين او زي ماهمه عايزين يقولوا

طب تصدقي ان الشعب هنا بيتريق علي اوباما ومطلعين عليه نكت بعدد شعر راسه ومش بيحبوه وبيقولوا عليه رغاي
الله اومال مين انتخبه هنا
قال لك السود والمسلمين والاغراب
وهم هنا كتييييييير جدا جدا

nour shahen يقول...

والله عندك حق الى حد ما لكنى متحامله اكتر علي الشباب يعنى لو شغلوا نفسهم بحاجات تانيه مش هيتعرضوا لصور ولا مواقف ولا افلام الا لو فى الشارع بقى ويقدر بكل بساطه يغض البصر اصلها مش هتمشى فى الشارع لابسه مش لابسه زى التليفزيون يعنى
يعمل اللي عليه وربنا يصبره ويصبرنا علي البلاء اللي احنا فيه واحنا برضوا كبنات نمشى محترمين ونراعى حرمة عيون الناس مش نأزيهم
وتحياتى ليكى علي اثارة الموضوع دا

محمد عبدالرحمن شحاته يقول...

أنا ودماغي
هذه زيارتي الأولى
وحبيت أشكرك على هذا الموضوع
لأن للأسف فكرنا الحالي هو العقل المقلوب أو العقل المثقوب الذي تتهدر من ثقبه الأفكار دون أن يشعر بها أحد
فما فعلته الأخت يسرا هذا ما نفكر به وهو نظرية التحضر كما يراه البعض وقالت ان في امريكا مايدث هناك شيئ عادي ولا يوجد اغتصاب وحينما قلدناه هنا كثر الاغتصاب
ده لأننا حينما نقلد أحد لا نختار منه الا السلبيات ولأننا مجتمع من طبيعتنا أن نكون إيجابيين على ما هو المفروض ولكن دعينا نتكلم في الواقع فانقلبت حياتنا رأساً على عقب .
عذراً على الإطاله ...
وأحلى سلام لطلبة كلية تجاره والتجاريين ومحاسبين مصر
لأن أنا كمان تجاره المنصوره
بس عربي
تقبلي مروري

مجموعة حياة يقول...

يا الله اد ايه حبيت الكلام وحبيت عصبيتك اللي جت بمحلها اوي اوي
بجد مش طالع معاي غير اقولك تسلم ايدك اللي كتبت الكلام ويسلم الدماغ اللي يا ريت كتااار بتفكر زيه


أم المييس

طهر فؤادك يقول...

السلام عليكم ورحمة الله وبركاتة
جزاكى الله خيرا فعلا على الموضوع الجميل دة وياريت يكون تفكير البنات نفس تفكيرك كدة لاننا محتاجين بنات مسلمات يكون تفكيرهم ناضج ومتفتح وفى نفس الوقت لا ينقصهم التقوى والايمان(وهو الاساس) وثبتنا الله واياكى والمسلمين على طريق الحق واتباع سنة الحبيب المصطفى سيد البشرية سيدنا محمد صلى الله علية وسلم وادعوكى واصدقائك الى زيارتة مدونتى (رسول الله1) وربنا يكرمكوا يارب والمسلمين :-
http://rasoulallah1.blogspot.com/

دعاء مواجهات يقول...

كنت عاوزة اقول ان مش العرى بس سبب الاغتصاب ولكن اللبس المقزز والضيق والشفاف بشكل عام

وكمان سلوك البنت فى الشارع وطريقة مشيتها او نظاراتها اللى ممكن بيها تبعت مليون رسالة تدل على شخصيتها
الاساب كتير ومعاكى ان البنت زى ما هى ضحية هى بردو اللى بتدفع المغتصب لدة بالسلوك السئ

تحياتى

ريمان ونوسه فى هاكونا مطاطا يقول...

انت لسه هنا؟


لا لا تعالى بسرعه عندنا


تيمون وبوبما عايزينك


كل ما تضحك اكتر كل تاكل بطاطا اكتر

هاكونا مطاطا

مش هتقدر تغمض عنيك

هاكونا مطاطا هديتنا لكل المدونين عشان نخرج من حاله النكد

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

وياريت تضيف اللينك عندك
ومش هتندم ابدآ

مودتى

طوبة ذهب وطوبة فضة يقول...

كل سنه وانتى بالف خير وصحه وسعاده ياقمرايا

nono يقول...

مدونة رائعة

سلوى يقول...

كل سنه وانت طيبه
وبخير وصحه وسلام
أنت وكل الأسرة :)

blue-wave يقول...

فينك كل دا يا بنتى؟؟

انا ودماغي يقول...

ربنا يخليكم ليا يا رب

و سامحونى على التأخر فى الرد