لبسونى السلطانية :)

جالى تاجين يا جماعة من حبيبة قلبى محاسن صابر صاحبة مدونة (عايزة اطلق و ..)

و بجد أنا بشكرها اوى لأن هى أول حد يبعتلى تاج و أنا فرحت أوى بجد

. بدأت تدوين امتى ودخلت العالم دا ازاى

بدأت تدوين من شهر 8 اللى فات ده...لسة ورور يعنى

و الله أنا مكنتش اعرف عنه حاجة لحد ما لقيت مرات خالى صاحبة مونة (إنسانة شوية و شوية)عملت واحد

بصراحة عجبتنى الفكرة أوى و ماما كمان عجبتها و بقت تشجعنى و الحمد لله عملتها

2.. آيه كان انطباعك فى البدايه ؟

بجد كنت خايفة أوى كنت حاسة إن محدش حيرد عليا خالص و قعدت أقول إيه اللى أنا حكتبه مهم يعنى عشان حد يجى

و يرد....و بعدين دول مدونات فى بعض أكيد مش حيبصولى

و قعدت اقول أنا أكتب و اللى عايز يجى و أقعدت كام يوم مش لاقية حاجة

و قعدت أقول طبعا ما هو محدش عجبه اللى أنا بكتب

و بعدين أكتشفت إنى لازم أروح للمدونات التانية عشان أتعرف

أصلى أنا كنت فاكرة إن لما حد يعمل بلوج جديدة البلوجات التانية حتعرف كدة لوحدها (إزاى معرفش

المهم روحت و رديت و فى نفس اليوم لقيت حبايبى بيردوا و بجد كنت سعيدة أوى و بقيت حاسة إن الدنيا مش سايعانى

3.. مين اكتر حد بتهتم بتعليقه على البوست الجديد ؟

بجد و الله كلهم على راسى من فوق و كفاية أنهم أتنازلوا و جم عملوا تعليق عندى

بس فى ناس كدة بحس أنهم جزء من البوست الجديد

و هما كل المدونات اللى موجودة على الجنب دى و أى حد بيرد جديد و ليه أكتر من تعليق عندى و الله بشيله على راسى من فوق

4.. آيه اهم حاجه اتعلمتها من عالم التدوين ؟

و الله أنا لسة جديدة فا مش عارفة أوى

بس أتعلمت إن يكون عندى ثقة فى نفسى و مكسفش أنى أقول رأيى

و أن البشر أشكال و ألوان كتيرة أكتر من اللى انا أعرفه

5.. أيه اكتر حاجه كرهتها ؟

المدونات اللى بتشتم الإسلام و بتدعو للعالمانية و بتدعو للشذوذ

لأنى أنا كنت بسمع عنهم بس بجد مكنتش متخيلة أنها بالوقاحة دى

6.. حاسس ان التدوين ليه تأثير ؟

أكيد...أتعلمت انى لازم أوسع مداركى و إنى لما أكون غلطانة اقول انا غلط لأن ده مش عيب

و اتعلمت لكل واحد ليه مدخل و مش كل الناس تقدر تكسبهم بسهولة

و لازم يكون فى مرونة فى التعامل مع الناس

===========================

التاج التانى

=============================

1 .. أذكر ستة اسرار لا يكتشفها من يقابلك لاول مره ؟

إيه ده

السؤال ده غريب جدا

امممممممممممممممممم

1- أنى بكلم كل الناس و عادى مع أى حد لأن فى ناس بتفتكر إنى مش من السهل إنى أكلم أى حد كدة

2-أنى مجنونة جدا و بعمل حجات هبلة بس ببقى عايشة دور الهادية مع الناس اللى بشوفهم لأول مرة

3-ناس قالتلى أنها أول ما عرفتنى كانت فاكرة إن دمى تقيل بس لما عرفتنى قالولى طلعتى دمك خفيف أوى

2.. سبع حاجات نفسك تعملهم ؟

:)

هما فيهم حجات غريبة شوية بس بجد ده اللى انا عايزة اعمله و يارب يحصل

1-عايزة أكون مسلمة صح و أعمل حاجة للإسلام تعيش و الناس تفتكرنى بيها و تترحم عليا

2-نفسى أبقى دكتورة فى الجامعة

3-نفسى أكون سيدة أعمال ناجحة

4-نفسى ابنى جامع

5-عايزة أعيش عيشة منظمة و أمشى مرة واحدة فى حياتى على جدول أنا أعمله

6-عايزة اقيم علاقة صداقة صح و أعرف أختار واحدة تكون زيى و تحبى عشانى مش عشان حاجة تانية

7-نفسى أوى أحج و كل سنة أعمل عمرة فى العشرة الاواخر من رمضان

3.. سبع حاجات معرفتش تعملهم

عاااااااااااااااااااااااااااااا

ليه بس تقليب المواجع

ماشى نقول و أمرنا لله

1- معرفتش اطلع من العشرة الأوائل على الحمهورية فى الثانوية العامة :)

2-معرفتش أقيم علاقة صداقة ناجحة 100 % لأسباب خارجة عن إرادتى و سوء إختيار منى

3-معرفتش أحتفظ بحسن نيتى المقدمة فى التعامل مع الناس

4-معرفتش أقول لأ فى موقف كان لازم فعلا يتقال فيه الكلمة دى

5-معرفتش أستمر فى لعب كرة الطايرة و سبتها للآسف

بس متهيألى هى دى الحاجات اللى معرفتش اعملها :(

4.. 7سبع حاجات دايما بتقولهم ؟

عااااااااااااااااااتى-قشطة-يا راااااااااااجل-كوكا كدة

فهمانى-أى خدعة-لما حد يقولى شكرا بقوله (العفش) بدل العفو :)

5.. سبع مشكلات فى حياتك ممكن تحلهم بالفلوس ؟

بما أنى لسة قاعدة مستستتة فى بيت الوالد واكلة نايمة شاربة لابسة من غير ما أغرم و لا نكلة

فا معتقدش إن عندى مشاكل ممكن تحلها الفلوس

6.. سبع اماكن بتحبها ؟

1-بيتى و خصوصا البلكونة البحرى

2-الساحل الشمالى

3-السيدة زينب

4-المقطم....بموووووت فيه بحس لما بروحه أنى فى مصيف

5-أى مكان فى مية و هوا و خضرة بعشقه

6-نادى 6 أكتوبر

7- أوضة الموسيقى اللى عندنا فى المدرسة....بتفكرنى بأيام العز و أيام الواحد ما كان عنده صوت و بيغنى

7.. اشخاص بتحبهم غير بابا وماما واخواتك ؟

بحب أى حد أحسن أنه بيحبى بجد

لما بلاقى حد كدة بجد بيكون أهم حد عندى

8.. مدونيين بتحب تقرالهم ؟

كل اللى على الجنب دول و الله فى ناس تانية لسة عايزة اضيفها عندى بحبهم برضه

9..تمررى الواجب ليمن؟

لكل حبايبى اللى بحبهم اللى فى الجنب بتاع (ناس جميلة عرفتها)

أول يوم جامعة يا ولاااااااااااااد ( إهىء إهىء)

إمبارح بقى يا جماعة كان آخر يوم فى الأجازة حبيبتى و كنت زحلانة أوى اوى

لأنى بصراحة مكنش طايقة أبص فى كتاب......بس بقى قعدت أقول لنفسى يا بت ده أنتى أول مرة تروحى كلية

لأ و مش أى كلية دى تجارة إنجلش اللى نفسك فيها.....إنى أتهد و احس أنى فرحانة ابدا

فبعدين قلت أكلم صحبتى اللى معايا فى نفس الكلية بس شغالة يوم السبت

كلمتها و كان الحوار

أنا:ألو إزيك يا سارة

سارة:ميرو .....إزيك يا كوكا عاملة إيه

أنا:تمام الحمد لله...المهم أنتى عملتى إيه النهاردة

سارة:أستلمت الكتب

أنا:ماشى ماشى...انا قصدى عملتى إيه فى المحاضرة يا فالحة

سارة: مروحتش

أنا: يخرب عقلك ......ليه كدة بس

سارة: عشان الجدول اللى انتى و مريم جنتيه بتاع الأيام العادية أما مواعيد رمضان مختلفة يا أستاذة

أنا:لااااااااااااااااا........واحدة واحدة كدة ......يعنى إيه يا ماما

سارة:يعنى مواعيد رمضان بدرى ساعة ياختى

أنا:يا نهار أحوح........و أنا اللى كنت مكسلة اكلمك...طب أنا عندى فى الجدول المحاضرة الساعة 11 يعنى تبقى 10

سارة: أسم الله عليكى

أنا : و على اللى حواليكى يختى

و بينى و بين نفسى(هو شكله حيبقى اسبوع عسل ما هو باين من الجدول)

أنا تانى:طب الكتب إيه نظامها

سارة:عااااااااااااااااااا..............الكتاب الواحد قد الجبل و النبى ما تفكرينى ما أنتى حتتصدمنى بكرة أنا بوعدك

أنا: بت أنتى أتلمى و قوليلى حاجة عدلة العملية مش ناقصة.......أنتى بكرة محضرتك الساعة كام

سارة: الساعة 8

انا: يالهوى طب ما أنا كنت عايزة انزل معاكى ...أنا لا يمكن أنط من على سلم السودان لوحدى آه أنا بقولك أهوه

سارة:و حتصحى الساعة 6 يا موكوسة

أنا: أمرى لله ما هى ليلة عسل.....خلاص بقى ياختى أنا حصحى على 6 و ننزل على 7 كدة

سارة:أميرة....حتعرفى تصحى

أنا : يا بنتى هو انا أساسا أعرف اصحى إلا الساعة 6 بالظبط ده حتى معادى المفضل فى الصحيان عارفة لو مصحتش 6 أفضل نايمة لتانى يوم عشان أصحى 6

سارة: يا سلام أنتى حتقوليلى ....أنا طول عمرى أقول أميرة هى اللى فيكوا

أنا : طبعا هو أنتى خلفتى غير أميرة........بت أجرى من وشى الساعة دى بقى و أقفلى عشان أشوف حعرف أصحى فى الميعاد المتخلف ده إزاى.......حسبى الله و نعم الوكيل

سارة: أنا أنا كمان ححاول أنام و لما أجهز بكرة حكلمك.يللا باى

أنا : باى

بصيت فى الساعة لقتها 12

قلت يالهوى بقاااااااااااااااا......ده هو ده الوقت اللى بتبدأ دماغى تلعلع فيه أنام إزاى بس

أهو جالك الموت يا تارك الصلاة......عشت و شفت ورقة مواعيد صغيرة بتربيكى

و عشان مش عايزة تنطى من فوق الكوبرى لوحدك صحيتى من 6

يمهل و لا يهمل

أخش أنا بقى

جيت أقفل نور الأوضه

قلت يا خبررررررررررر

ده أنا محضرتش حاجة لبكرة.....روحت جبت البلوزة الحمرا و الكارينا البيضا و البنطلون الأسود و الطرحة الحمرا و البندانا البيضا

و أخيرا البلارينا الحمرا.......يا عينى على الحمورية

قعدت بقى رتبت الدنيا و حططهم كدة بشكل حلو على المكتب مش فاهمة ليه.....و حطيت كشكول سلك فى الشنطة و معاه القلم

و نمت على 12 و نص و صحيت 1 و نص

صحيت على صوت تحمير بطاطس

فأنا قلت إيه ده هى ماما حتعملى ساندوتشات بطاطس و أنا رايحة الجامعة.....طب كويس (ده على أساس أننا مش فى رمضان يعنى )

بس إيه ده هى الساعة 6 مش برضه بيكون فى حبة نور مش فى الضلمة دى

آه بقى ما هو يوم مطلعتلوش شمس ليها حق الساعة 6 تبقى كدة

الله.........لا فى حاجة غلط...روحت فاتحة الموبايل لقيت الساعة 1 و نص و اتارى صوت التحمير ده صوت ماما و هى بتغسل المواعين

و طبعا لتشابه صوت التحمير و المواعين اختلط عليا الامر .......عااااااااااااااااتى بتحصل فى أحسن العائلات

المهم قعدت أنيم نفسى أنى انام أبدا.فقلت خلاص أقعد أدعى ربنا كدة شوية و أنا نايمة يمكن عينى تغفل....أبدا برضه...المهم نمت على 5 و نص تقريبا أو 5 مش عارفة بقى.......بس فجأة لقيت أخويا بيخبط على باب الأوضة بيقولى أصحى الساعة 6 و نص.....فانا قمت أتنطرت من على السرير جريت على الحمام غسلت و شى و روحت لبست و ببص فى الساعة لقتها 7 إلا 10

حسيت بلذة الإنتصار بصراحة (نياهاهاهاهاهاها......أنا سوبر اميرة التى لا يقهرها الوقت)

روحت كلمت سارة لقتها بتقولى انا لسة بلبس

=================================

المهم أحنا دلوقتى فى ميدان لبنان نزلنا و كان حتما و لابد أنط من عند سلم السودان عشان أركب للجامعة

نطيت بصراحة و أنا مكثوووووووووووفة.......يعنى عيب و أنا بالحمار اللى أنا لابساه ده كله انط بالمنظر ده....و أنا بقى واقفة مش عايزة أنط لقيت ست عجوزة بتقولى ما يللا يا أختى نطى و خلصينا

روحت نطيط بس برضه و أنا فى برستيج آه.....ده أنا طالبة جامعية مش أى كلام

روحت بقى الكلية كانت أول محاضرة فى المدرج الرئيسى و كان مكيف بقى و مريييييييح و الدكتورة بتتكلم بالميك

و قشطة و شفت كل الأشكال لما رحت لقيت المجتهد و اللى منفض اللى يكتب كل حاجة بتقولها الدكتورة حتى تعريفها لنفسها و اللى بيكتب بس بحساب

المتبرجة و المنقبة و المحجبة أى كلام و المحجبة صح..........حسيت أنى فى عالم كبييييييييير أوى

و كانت محاضرة جميلة أوى عن الإيكونومى

و بعدين طلعنا السكشن و خدنا ماس بصراحة بتوع المدارس العربى صعبوا عليا أوى لأن الدكتور كان كل كلامه إنجلش و هما مش متعودين على كدة خصوصا فى حكاية الأرقام و الحسابات

فوحنا خارجين لقينا واحد فى عربى وقف عند الباب و قال:

يا جماعة اللى لغات و عارف يفهمنا يا ريت يجى يفهمنا

أحنا طبعا مشينا لأننا اصلا منعرفش نكتب رقمين بالعربى

فراح مزعق تانى

يا جماااااااااااعة طب اللى عربى و فهم يا ريت يفهمنا

بس الحمد لله فهموا فى الآخر

و كدة خلصت المحضرات على خير

روحت بقى للبت مريم فى سياسة و إقتصاد لقتهم بيوزعوا ورد و بيحتفلوا بالطلبة الجدد

الحقد الطبقى أشتغل هنا بقى

قعدت أقول و أشمعنا أحنا...آدى ياختى سياسة و إقتصاد اللى مرضتيش تتدخليها

بس أنا بقى مسكتش...روحت سألت ليه مفيش عندنا كدة...قاللوى لاااااااااااا..ده فى ويلكم بارتى فى الفراى داى على اليخت أو فى الشيراتون

أنا قلت

يا حللولى يا حللوى.......أهوه هو ده

مع إن إحساس جوايا بيقولى إن مفيش كدة

المهم خدت مريم و سارة و آية و رحنا للبت مها فى إعلام ......لقينا قال خير اللهم ما أجعله خير

قال النايل تى فى بتصور مع الطلبة و فى حفلة جامدة و مشغلين اغانى و حطين صور ممثلين و عيشة قشطة آخر حاجة

بس أنا لما أتجننت افتكرت الشيراتون ده فا نفسويتى فديت حبة

بس للآسف انا كنت ناوية من أول يوم أتعرف على الدفعة كلها لكن أتعرفت على 6 بس :(

أصل اليوم كان متعب و مفيش وقت لإقامة العلاقات

بس ده لازم يحصل.......أمتى بقى مش عارفة

جينا بقى نروح و ياريتنا ما فكرنا نيجى أصلا

قلنا...أحنا لا يمكن نركب مكروباص.....أحنا ناخد تاكسى لحد ميدان لبنان مش ناقصة فرهدة فى الحر ده....قعدنا نص ساعة و مقيش تاكسى

قلنا خلاص بقى يبقى ميكروباص رايح ميدان لبنان...بس لاااازم ميدان لبنان عشان نوصل بسهول

قعدنا 35 دقيقة و مفيش حاجة رايحة ميدان لبنان

و كنا كلنا خلاااااااااااااص خلصنا خالص

ففجأة لقينا واحد بيقول جيزة جيزة جيزة........فكلنا من غير ما ننطق نطينا فيه

ركبنا و قعدنا الأول مبلمين محدش طايق حد بس بعدين التهيس أشتغل

و لقينا سارة بتقول آل وا أنا اللى كنت خايفة أروح مبنى الجامعة اللى فى الشيخ زايد لما يفتحوه و أقول ابدا لازم أروح جامعة القاهرة

ياخى جتى ستين خيبة مالها الشيخ زايد جنب 6 أكتوبر و زى الفل

و لقينا مها بتقول آل و أحنا اللى كنا بنتبطر على النادى و نقول قريب من البيت و ننزل نروح سيتى ستار و المهندسين و الذى منه

ماله النادى مكان نضيف و حلو و حياة ربنا لو جالى دعوة مجانية فى أى حتة غير 6 أكتوبر ما حروح ياكشى أولع

أدى أخرت اللى بيتبطر

و المهم قضيناها ضحك و تبليم

و نزلنا الجيزة لقيناه أتوبيس مكتوب عليه من فوق الشيخ زايد و 6 أكتوبر

أنا قلت با بركة دعاكى ياأما ......أول ما ننزل كدة يبقى فى وشنا واحد اكتوبر على طول ....جينا نركب فالراجل قال لو اكتوبر انزلوا لاننا مش رايحين غير زايد

نزلنا و أحنا خلاص حنعيط

و بعد معاناة لقيناه واحد رايح اكتوبر

وو صلنا و أنا و مريم و سارة خدنا تاكس لحد البيت

و آآآآآآآآه يا رجلينا لأ و أنا كمان كان معايا الكتب الغريبة جدا دى و مش عارفة أشيلها و محتاااااااااااااسة

أنا فى الآخر حمدت ربنا أنه خلانى اختار الكلية الصح لأنها عجبتى بصراحة

لكن فى ملحوظة

طالب الجامعة مش زى ما كنت فاكرة حاجة كدة جامدة.لاااااااااااااااااااااااا

ده أكتر واحد متبهدل فى البلد دى

أوعوا حد يفكر كدة

و عن إذنكوا بقا أروح أفطر

عارفة أنى دوشتكوا :)

يوم الإستعباط العالمى

بقى أنا النهاردة يا جماعة روحت أصلى التراويح بس روحت و أنا تعبااااانة و نفسى أنام مع أنى مكنتش داباها على الفطار و لا حاجة

و لا كلت نص كمية الفراخ السبايسى اللى موجودة و لا كلت طبق رز كامل من اللى قلبك يحبه و لا كلت جلاش مثلا و لا جربت الكحك اللى ماما عملته _أصلى ماشية على الرجيم تمام فى رمضان_

المهم روحت و انا عايزة أنام و مش عارفة ليه زى ما قلتلكم

الجامع اللى بروحه دور الستات اللى فيه فى حته كدة عملنهاه روف للصلاة بردو أنا بحب أصلى فى الروف لان الهوا بيكون رائع جدا و كمان فى حته فى الآخر عاملة زى مصطبه بقف قدامها عشان لما أتعب اقعد أصل الإمام بيقرا جزء كامل و براااااحة

فالمهم المكان ده بيبص على الرجالة و بدى منظر كامل ليهم

فأنا بقى روحت تعبانة و عمالة أنام و مش قادرة و ببقى مش عايزة أقوم من السجود عشان أفضل مغمضة عينى حبة و كنت حاسة أنى خلاص كدة وصلت لقمة التهييس

فأول ما وقفنا و الإمام بدأ يقرا الربع الخامس لقيت موبايل بيرن و بيقول (أنا لو أزينه كان عملى زيادة عن كدة إيه بالعكس عمرى ما خدت منه نص اللى أنا بديه)فقلت إده الناس دى المفروض تعمل الموبايل سايلنت

و يارتها جت على السايلنت يا أخويا ...ده أنا لقيت الأسخن...و الموبايل بيرن فى الصلاة لقيت اللى قاعدة على المصطبة ورايا بتقول :ألو॥إزيك يا حبيبتى عاملة إيه ...لوك لوك ॥و رغى بقى

فأنا قلت يالهوى هو وصل بيا التهيس لدرجة انى بتخيل ناس بيرن موبايلهم فى الصلاة و كمان بيردوا.....يا خسارة عقلى اللى كان سليم....لأ مبدهاش أنا لازم أطلع من الصلاة ...فا و كل ده بيدور فى دماغى الست شغالة كلام ....و أنا أقول الله بقى مفيش هذيان بيقعد كتير كدة ...مصيبة لا يكون فى حد بيتكلم بجد॥فا قلت أبص على الست اللى جنبى اللى قاعدة على المصطبة لان الصوت جى من عندها

أبص ألاقيها بتتكلم و بتقول :لا لا لا أنتى أكيد بتهزرى ده الموضوع كبير بقا...طب بقولك إيه أنا حخلص صلاة و أكلمك يللا باى يا سكرة

أنا بصراحة بعد ما شفت المنظر ده أطمنت على دماغى و عرفت أنها لسة مباظتش ...بس معرفتش أفكر فى السلوك الست العظيم ده لأنى مكنتش مستوعبة و قلت طب ما أنا يمكن متخيلة انى فى صلاة التراويح بس أنا فى مول مثلا....بس إزاى ما أنا سامعة الصلاة و بسجد و الست اللى جبنى زقتنى من شوية عشان تآخد مكان و الإمام بيقرا أهوه...يا خبر الإمام بيقرا صحيح ॥لا ركزى يا بت و بعدين اندهشى ॥فأول ما جيت أركز عينى جت على مكان الرجالة.....لقيت فى الآخر كدة رجالة نايمة و أتنين بيلعبوا بالموبايل و إذ فجأتا لقيت راجل زى العسل ماسك كيس أبيض و جاى من أول الصف لحد آخر الصف فأنا بقول الله ده ماسك شنطة يعنى حيوزع حاجات ....طب إزاى يوزع على ناس بيتصلى .....هى الصلاة خلصت و انا مش دريانة.......بس الحمد لله طلعت أنى دريانة و الصلاة و مخلصتش و الراجل عمل حاجة لطيفة احيه عليها بصراحة ......لقيته طلع مخدة من الكيس و فرش و نام فى العنبر اللى فى أخر الصف......بعد ما شفت المنظر ده قلت أنا أكيد بهزى الكحك خلانى أشوف خيال علمى بيحصل فى المسجد بس اللى فوقنى صوت الإمام و هو بيقول الله أكبر

(قشطة.....أهوه ربع ضاع منى فى خزعبلات)

تفتكروا دى خزعبلات فعلا و لا إيه.....إزاى ده يحصل

ما كان من زمان الكلام ده

أنا بجد متغاظة من نفسى و من دماغى اللى قلتها أحسن بجد ....كنت دايما قبل ما آخد أجازة ३ ثانوى أقول لنفسى أنا لما آخد الأجازة لو صحيت قبل الساعة أتناشر أبقى دزمة أستاهل ضرب الدزم و فعلا من أول يوم نفذت اللى قررت و بقيت أنام على خمسة كدة و اصحى الساعة واحدة أو أتنين و كنت الأول فرحانة بالقرار العظيم ده...بس حسيت إن اليوم بيجرى زى الغزال اللى بيجرى وراه أسد و عايز يطفحه أول ما اصحى مفيش ساعتين و ألاقى ماما جت من الشغل و ساعة و ألاقى نفسى على السفرة بتغدى و بعديها بساعتين أنزل أمشى و بعديها بساعة اروح النادى و أرجع البيت و أبدا الملل بتاع بالليل النت و التلفزيون و قبل النوم قرايه قرآن (بجد يا حماعة الليل ده بكره أوى كله سكون و ناس قاعدة فى بيتها إنما الصبح هو الحركة و النشاط) المهم عرفت إنى القرار ده طلع بمبة و مش سليم بس متأخر اوى ...حقيقى يا جماعة اللى ميصحاش بدرى ده يبقى ما عاش يومه يا سلام كدة لو الواحد يصحى على تامنية الصبح يعملله كوباية شاى بلبن و لا كوباية عصير مانجة مشبرة و يروح يعد فى البلكونة البحرى و أوعى بقا لو معاه كتاب كدة لأحمد رجب و لا أنيس منصور و يلحق النسمة الباردة الجميلة بتاعة الصبح دى و أى حاجة عليه حيخلصها بسرعة و مش حيحس أنه تعب منها و كمان ممكن يخترع حاجات جميلو اوى لنفسه .....آآآآآآآآآآآه نعمل إيه بقى فى التفكير الغبى جدا ده يللا أهوه الإنسان عايش يتعلم من غبائه

حكايتى مع الكليات بعد النتيجة :)

أنا من أيام ما كنت فى خامسة إبتدائى كنت دايما أقول مش حدخل إلا ألسن و فقضلت على ألسن دى لحد تانية ثانوى و بعدين بدأت دماغى تروح لإعلام لأنى حسيت أنى بحب التعامل مع الناس و قسم العلاقات العامة حيكون حلو أوى و فضلت متربسة فى إعلام و قلت إن شاء الله أول ما تطلع نتيجة سنة تالته و نكتب الرغبات إعلام حتكون رغبة اولى فورا من غير كلام إعلام فأول ما طلعت النتيجة كل اللى كنت بقوله طار لأن القول مش زى الفعل أنا لقيت نفسى قدام سياسة و إقتصاد و إعلام و السن و تجارة إنجلش (بس مكنتش عايزاها اوى) برضه أنا ىسه كنت عايزة إعلام بس برضه لازم أسأل و اطقأس يعنى بدأت بسياسة و إقتصاد مع أنها طول عمرها مش فى دماغى و لما سألت اللى قعد يقولى لازم واسطة و اللى قعد يقول تجارة إنجلش بقت أحسن منها بكتير و انا أساسا مكنتش عايزاها فمسألتش كتير يعنى॥جيت بقى عند إعلام و وقفت بقى ما هى دى اللى انا عايزها لأنى عايزة دراستها و حباها أوى اوى و كمان أنا بحب العلاقات العامة و بحب برضه شغل الإعلانات و كل إعلان أشوفه أتنح قدامه و انقد الفكرة و احللها فجه أول قلم خدته قالوللى الحجاب و مش الحجاب و ممكن يكون عائق (و انا لا يمكن أقلع الحجاب مهما حصل) فبدأت أكش شوية بس بسأل برضه فا اللى سألتهم قالولى إن علاقات عامة اى حد ممكن يشتغلها بس بتاع إعلام بيكون ليه الأولوية و مجال الإعلانات عموما يعنى مش بتاعنا اوى و عايز ناس معينة و كدة و الصحافة و الإذاعة و لتلفزين شرحه بس انا كنت حابة دراستها بس كنت عايزة أشلها من دماغى و فى نفس الوقت قعدت اقول المستقبل بتاع ربنا بس أنا كنت بدور على المستقبل المضمون أكتر و كنت خايفة أدخل المجال ده و اضيع فيه (بس بالرغم كل ده كانت لسة فى دماغى) و بعدين السن بعيدة اوى عنى و مشوارها طويييييل و كمان التخصص حيكون فى لغة بس أى نعم دى حاجة كويسة اوى بس فى نفس الوقت ممكن اللغة تتجاب من أى حتة

ففكرت فى تجارة إنجلش اللى كنت بستبعدها من زمان لأنى كنت حاسة إنى مليش فى تجارة بس اللى سمعته عنها و عن مستقبلها و عن جمال الكلية نفسها و مناهجها خلانى أفكر فيها جامد أوى و كمان عرفت أنهم بيدرسوا مناهج زى اللى عند إعلام و دى كان حاجة نفسى فيها فحسيت إن دماغى حتفرقع لان الصراع زاد جوايا بين إعلام و تجارة إعلام من حيث الدراسة و تجارة إنجلش من حيث المستقبل و البرستيج

روحت صليت إستخارة و لقيت نفسى مياله لتجارة إنجلش فقلت خلاص هى دى بس قبل ما اعمل اى حاجة قريت شوية على النت عن البزنس و الأسهم و الماركتينج و قريت عن طبيعة المناهج فيها فحبتها و استلتفطها و قلت خلاص بقى أكتبها إن شاء الله رغبة اوى و كتبتها و من كام يوم قبلت فيها لان تنسيقها غير تنسيق تجارة عربى و الحمد لله طلعت التامنة فى المقبولين ... يا ريت بقا تدعولى ربنا يوفقنى فيها و اللى يعرف أى حاجة عنها برضه ياريت يقولى يعنى زيادة إطمئنان ؛) و الله ربنا يعلم أنى سألت طوب الأرض و عملت اللى عليا

لما نزلت أجيب هدوم الجامعة

من كام يوم كدة نزلت عشان أجيب لبس الجامعة(ما الواحد بقى لازم يتشيك)المهم...أنا طبعا خسيت كتير عن أيام الإمتحانات بس محستش ده فعلا إلا لما رحت أجيب الهدوم لما روحت بقت الحاجة اللى تعجبنى أروح أقسها على طول _ ده زمان كان عمره ما بيحصل كنت على طول أبص على المقاس اللارج فيما فوق_دلوقت بقا بقيت أقيس كل المقاسات حتى الإسترتشات (بس طبعا طلعت مش ولا بد أنا لسة مبقتش سامبتيك) و لو اول مرة أجيب لبس يعجبنى كله بجد و أول مرة أشوف كلمة مديم على لبسى و اول مرة اسمع ماما بتقول أحلى كلمة سمعتها فى حياتى كانت بتقول للبياعة "عايزة المقاس الأصغر لو سمحتى"و دى أول مرة تحصل ... بس بذمتكم مش لو كان التخن موضه بجد كان زمانى مش عاملة زى محدثين النعمة كدة و لا كان زمانى منبهرة أوى بلبس اوى أنا جايباه كدة:(