التخن لازم يكون موضة

أنا مش فاهمة يعنى هو ليه يعنى كل ما واحدة تتخن يقوللها خسى ليه يعنى الغم و الهم فى شرع مين إن الواحد يبقى شايف قدامه شكولاتة و لا مانجة و لا آيس كريم (آآآآآآخ)و ميجيش جنبهم ده إيه ده بصو أحنا لازم نصحح مفهوم خاطىء بقاله سنين و سنين لازم نقوم بحملة و نطالب بأن يكون التخن هو الموضة مدى الحياة و دة لأن مميزات التخن كتيرة جدا و هى:

१- إن الواحدة تكون مالية مركزها و محدش يحس إنها هفأ مثلا

२-مفيش تلف أعصاب لما الواحدة تشوف المحشى و المحمر و المشمر لأن كدة كدة حتآكل بقا

३-لما يكون التخن موضة معنى كدة إن كل اللبس حيكون حجم كومبو فمش حيكون فى أزمة فى القياس الواحدة أول ما تتدخل المحل تاخد كل اللى هى عايزاه وش

४-ده حيشجع أغنية (أكلك منين يا بطة) و حيروجها جدا

५-الرفيعين حيكون عندهم و لأول مرة عقد نفسية لأنهم حيعانو عشان يكونو زينا(نياهاهاهاهاها)

ها يللا ننظم مظاهرة شعارها (لا نقبل بغير الكومبو)

الإنتظار اللذيذ

خلاص بقا يا جماعة كلها كام شهر و أكون طالبة جامعية (يا سلام على ده لقب)بس على قد ما الواحد خايف من الجامعة على أساس أنها تجربة جديدة و زى ما قالت كيارا فى فيلم لايون كينج(عالم تانى جديد دنيا منعرفهاش) على قد ما الواحد فرحان برضه لأن خلاص بتحس أنك كبرت بدأت تتحمل المسئولية و كمان داخل على أحلى دنيا ممكن تعمل من خلالها أحلى علاقات.....بس بقا حاجة مقلقة لأنى حاسة إن عمرى ما أتعملت مع الناس قبل كدة ....لكن أنا شايفة أنه أهم حاجة هو توافر الثقة بالنفس و كمان هى فرصة جميلة فى إن الواحد يستفيد من كل حاجة سلبية أو إيجابية حصلتلوا أيام المدرسة و يبدأ فعلا يبدأ حياة جديدة بنظريته اللى كونها....ربنا يسهل و تكون سنين الجامعه هى أحلى سنين العمر