الخميس، 11 ديسمبر، 2008

لبسونى السلطانية

قبل أى حاجة أنا بشكر محمد غالية جدااا على التاج ده :))
نخش فى المهم بقى
السؤال الأول:ماهى السعادة من وجهة نظرك؟
هو انا أسعد لحظات حياتى فعلا لما بحس إنى رضيت ربنا
و الله فعلا رضا ربنا بيخلى الواحد فرحان أوى
و كمان السعادة فى أنك تحس إنك السبب فى فك قرب حد كان محتاجلك
و برضه السعادة فى الحب حب ربنا و حب الأهل و الأصدقاء و الحب بين الجنسين
الحب برضه سعادته بتكون كبيرة اوى
السؤال الثانى: كيف تصل إلى السعادة؟
و الله فعلا أنا لما أحس أنى عايزة ابقى سعيدة أوى بروح أعبد ربنا و أدعيه و أول ما بخلص بحس إن الدنيا كلها فتحالى دراعتها
و كمان أكيد حصل للسعادة أول ما أحقق هدفى و أشوف نفسى زى ما أنا متخيلة
السؤال الثالث: هل السعادة وهم أم أنها حلم صعب؟
لا أبدا هى لا وهم و لا حلم صعب المنال
هى واقع سهل المنال بس بشوية تعب
يعنى مثلا لما أنت كل يوم بتصحى و فى فى دماغك حاجة لازم تنجزها و أنجزتها بتحس بسعادة
لما تخطط لحاجة مستقبلية قريبة و تحقق بتحس بسعادة
لما تيجى تنام و تبقى حاسس أنك أديت الفروض اللى عليك كما ينبغى بتبقى حاسس بسعادة
حجات كتيرة أوى ممكن تخليك توصل لسعادة حلوة أوى اوى
السؤال الرابع: هل السعادة طريق للنجاح ؟وضح؟
هى السعادة اللى بتيجى من النجاح أكيد بتكون طريق لنجاح جديد لأنك بتبقى عايز تجربها تانى
أما السعادة لأى سبب تانى فا مش شرط تكون طريق للنجاح
لكن اللى أكيد إن النجاح طريق للسعادة
السؤال الخامس: ماهى أكثر اللحظات التى شعرت فيها بالسعادة؟
لما طلعت نتيجة الثانوية العامة
بجد كنت حاسة إنى أسعد واحدة على الكرة الأرضية كلها
السؤال السادس:هل ممكن أن تحقق كل شىء؟
أكيد لا طبعا لأن دى سنة الحياة محدش بياخد كل حاجة
لأن ربنا موزعها
السؤال السابع: السعادة تجعلك تقبل على الحياة أم لا؟
أكيد طبعا
لأنك لما بتكون سعيد بتبقى فى حالة صفاء نفسى و بتبقى حاسس بطعم الحياة و ممكن الوحش بتشوفه حلو
إنما بقى لو جيت لواحد تعيس أجارك الله من اللى حتشوفه ممكن تروح ترمى نفسك من البلكونة من كتر القرف اللى هو حيقولهولك عن الحياة و العيشة
السؤال الثامن: هل أحسست يوما انك وصلت لقمة السعادة؟
أكيد اى وقت ببقى سعيدة فيه ببقى حاسة إنى فعلا فى قمة السعادة
السؤال التاسع: لماذا تمر أوقات السعادة بسرعة؟
عشان الوقت الحلو دايما بيجرى بسرعة و بتحسه قصير حتى لو هو طوييييييييييل
يعنى مثلا لو قعدت ساعة أذاكر أحس أنى بقالى أسبوووووووع
أما بقى لو زى دلوقت و جيت قعدت ساعة برضه على النت ححس أنى ملحتقش و إن الساعة بتستعبط
الفكرة فى أنك بتحب شعور السعادة و بتحب وقتها فا مش بتحس بالوقت أصلا إلا لما يروح
السؤال العاشر: هل ترى السعادة فى التدين؟
ده أكيد على فكرة
لأن كل ما بتقرب من ربنا كل ما بتحس بسعادة و لذة جميلة اوى اوى
لأن اى حاجة بتحصلك فى وقت تكون حاسس أنك فعلا قريب من ربنا حتفرح بيا حتى لو وحشة
يعنى انا فى وقت كنت حاسة إن فى بينى و بين ربنا عمار كبير أوى و كان فى حاجة نفسى أنها تحصل و لما محصلتش فرحت جدا لأنى حسيت أنى مدام كل حاجة مفوضاها لربنا يبقى ربنا مش حيجبلى غير الحاجة الصح
السؤال الحادى عشر: هل أنت متفاؤل وعندك أمل؟ وضح؟
آه الحمد لله
لأنى بحس إن التفاؤل ده هو اللى بيخلى الواحد عارف يكمل حياته
و بعدين الواحد مش بيبان أنه متفائل غير لما يكون فى حاجة زبالة أوى حصلت و هو بيقول معلش بكرة أحسن و هو فعلا قاصدها و حاسس بيها
فدايما أنا مع كل حاجة وحشة ببقى عكس ناس كتير معاية مقضياها كآبة لانى ببقى مقتنعة إن أى حاجة وحشة بعيدها حلو مش كله أسود
و غن الليل مهما طال أكيد الصبح حيطلع
السؤال الثانى عشر: إذا شعرت بالحزن ماذا تفعل؟
ليه الإحراج ده
أنا عن نفسى أول ما بزعل بجرى على المطبخ أدور على حاجة أكلها :)
فجعة بقى
بس بعد كدة بقعد أقرا قرآن شوية و بعدها بمسك ورقة و قلم و أكتب اللى مضايقنى و أقعد أبص عليه و انا بعمل كدة فجأة بيجيلى الحل اللى ممكن يخلينى مبسوطة تانى
مش عارفة إزاى بس ده اللى بيحصل و الله
السؤال الثالث عشر: هل يستمر معك الحزن فترة ام ينقضى فى الحال؟
لا الحمد لله مش بعرف أقعد زعلانة كتير
السؤال الرابع عشر: ما رأيك فى الأفراد المتشائمين؟
بكره حتى أمشى جنبهم
بجد الواحد مش بيتكلم معاهم إلا و هو خارج من الكلام ضغطه واطى و عايز يعيط و بيدعى القيامة تقوم عشان يخلص