السبت، 11 أكتوبر، 2008

آخر أخبار الأسبوع

آه و آه و كمان آه
فينك يا رمضان يا مدلعنا
و الله رمضان كان مدلعنه أوى كانت الجامعة رايقة و الموصلات جميييييييلة
و الناس حلوة كدة
خلص رمضان و الجامعة بقت امم و المحاضرة وصلت ل 80 تقريبا
و الكانزات و ورق الأكل بقى مرمى فى كل حتة
و لا الموصلات....أوعى وشك.....زحمة مووووووووووووت الريحة تشرح القلب الحزين
يعنى لما الناس تبقى الساعة 6 و نص الصبح و ريحتها تخلى الواحد يعيط لما يشمها
أما على الساعة 3 حتبقى إيه بكابورت
ما علينا
ننتقل للمنشتات و الأخبار
1-
تنوى "أنا و دماغى" قتل دكتور الmanagement أو إدارة الأعمال
يا جماعة الراجل ده غيظنى من أول أسبوع و هو يقولنا فى كويز المحاضرة اللى جاية
و أنا أقعد أزاكر و يجى بعد كدة يقولنا مفيش كويز
هو آه بيخلينا نزاكر بس احنا ممكن نذاكر بطريقة أفضل من كدة
هو المفروض اننا بكرة عندنا الكويز ده بس أنا بقى مش حذاكر
عشان فى حجات تانية عايزة أذاكرها
و عارفة إن على حظى اللى زى وشى حيعمل الكويز بكره
2-
أتعرفت على الجروب كله
أحم
هو مش كله أوى يعنى هو الجروب 80 تقريبا أنا أتعرفت على حوالى 60
بس طبعا كتييييير منهم بنسى اسمهم فى يوم التعارف
أقولكم حاجة
أحنا عندنا قسموا الجروبات حسب الترتيب الأبجدى
فعندنا الاسماء
آية و أميرة و أمنية و بسمة
فقابلت واحد كنت عرفتها من كام يوم فجت تسلم عليا فأنا قلتلها
أهلاااااااااااا
إزيك يا أميرة
أنا مش أميرة
معلش أنا أسفة إزيك يا آيه
أنا مش آيه
تبقى أمنية
و لا أمنية
أهلاااااااااااااااا إزيك يا بسمة عاملة إيه و إيه أخبارك
أنا مش بسمة
لا بقى انتى بتهرجى هى دى الأسماء اللى مسرح بيها هنا أنتى حتحمرئى من أولها و لا إيه
أنا اسمى هانيا
لا و الله و أنتى معانا فى الجروب
أيوة
طب أزاى
و الله مش عارفة أنا أتحطيت كدة و خلاص
طب إزيك يا هانيا عاملة إيه
بخير
لوك لوك لوك لوك
رغى
لا بصوا يا جماعة أنا بقيت منتشرة فى الجروب يعنى هما بقوا عارفينى كويس
بس كصوحبية مصاحبتش غير واحدة اسمها آيه
البت دى زى العسل و شبهى فى الطباع و بجد سعيدة أنى لقيت واحدة ممكن تتفهم حاجات كتير بقولها
غيرها مكنش بيستوعبها
3-
عدنا ويلكم بارتى يوم 10-15
حيعملولنا و ليكم بارتى أو حفل ترحيب الطلبة الجدد فى باخرة فى المعادى
إن شاء الله اول ما تتعمل حاجى أنقلكم الأخبار
4-
-واحد حب يتعرف إديته بالبلغة
آه ما أحنا مش داخلين نصاحب فى الجامعة أنا عندى بوى فريند و أنا عندى جيرل فريند
بجد يا جماعة بكره الحوار ده أوى و بكره أكتر أى علاقة بين ولد و بنت متكنش فى نور و الأهل قبل الناس عرفنها
5-المذاكرة
أنا بجد حاسة أنى تايهة أوى أو بمعنى أصح أنا فاهمة المنهج بس مش عارفة امسكه منين
عندنا إمتحان عامل زى إمتحان نص السنة و آخر السنة
بس هو بقى فى ربع السنة فا مش عارفة أسميه إيه
ده يوم 11-9
عاااااااااااااااااااااااااااااااااااااااااا
لابنا يستر أدعولى أجيب فيه تقدير
6- المواد اللى بحبها و اللى بكرهها
الmanagement :
بعشق المادة دى ...بحس أنها بترتب دماغ البنى آدم
و بتوريه إزاى يقدر ينفذ خطة كاملة متكاملة من غير و لا غلطة و إزاى يقدر
يعامل الناس اللى معاه فى الشغل بطريقة سليمة
الeconomy :
مش بحبها خاااااااالص و بحس أنها جغرافيا بس بالإنجلش
و أنا طول عمرى بكره الجغرافيا
بس اهوه بعافر فيها وربنا يستر
الكتب بتاعتها قدامى اهه عشان أبدأها أول ما أخلص البوست ده
الmath :
يا عينى يا لاللى
مادة بكرها من أيام ما كنت فى كى جى1
بس لما بفهمها بجد محدش بيعرف يقف قدامى فيها
بس أنا أفهمها
كتير حيقوللى طب بتكرهى المادة دى دخلتى ليه تجارة
أقوله لاااااااااااااااااااااا
تجارة لا علاقة لها بالأرقام أو على الأقل تجارة إنجلش يعنى
و
انا داخلة على أساس كدة لان أى حد يقولى رقم يبقى بيشتمنى
فأنا أهوه لحد دلوقتى فاهمة و ربنا حيستر إن شاء الله
الaccounting:
المحاسبة دى بقى هى التجارة فعلا
بصوا أنا بحب المادة دى و ناس كتير قبل ما أبدا فيها من الدفعات اللى قبل كدة
قالولى دى مادة غبية أوى و كل دكاترة جامعة القاهرة فيها مش كويسين و لا لازم تخدى فيها درس إلى ما آخر هذا
أنا دخلت و قلت لنفسى أنا لازم احاول أفهم و ما فكرش فى الكلام الفارغ ده
روحت و ركزت جامد و فهمت و بعد ما المحاضرة خلصت الجروب كله قعد يقول مش فاهم مش فاهم
قلت بسسسسسسسس
أنا كدة فهمت غلط أصل لا يمكن اكون أنا الفلته اللى فيهم
و لما روحت قلت لبابا على الحوار ده و قلتله إلى أنا فهمته
و بما إن المحاسبة دى لعبته
قالى لا أنتى فهمتى صح جدا
فروحت ذاكرت و بقت قشطة
ال
human behavior:
رووووووووووووووووووووووووعة
بتعلمك إزاى تتعامل مع دماغ الناس و إن كل واحد ليه مفتاحه و إزاى تتدخله
و بتعلمك إزاى تكون حد مقنع و إزاى تفسر ليه حد معين عمل فعل معين و هكذا
بجد عجبانى أوى أوى
الكارنيه:
حروح أطلع الكارنيه بكره إن شاء الله
عارفة إنى طولت عليكم بس أنا قلت أقولكم أخبار الأسبوع
معلش مكنتش قادرة أبين فيه روح الفكاهة لأنى بجد مش فى المود ده خاااااااالص
أصلى لما ببقى مركزة أو حاسة إن فى ورطة مش بعرف أهزر
و أنا بجد حاسة إنى فى ورطة و مش بسيطة
و أنا إن شاء الله حبقى أرد على كل تعليقاتكم و أعذرونى فى أى تقصير من ناحيتى فى الفترة اللى جاية
و بشكر فتاة الجنة أوى على اللى قالته و بقولها ربنا يخليكى

الأحد، 5 أكتوبر، 2008

أحم أحم......دماغ متخلفة بقى نعمل إيه (مجنون جننى خلااااص)

بصراحة حاسة أنى قرفتكم معايا
و أنا شايفاكوا من عندى اهوه بتحضروا الشباشب عشان تنزلوا بيها على قفايا
نعمل إيه بقى
ربنا إبتلاكم بيا و خلانى أبقى مدوناتية محسوبة عليكوا
أحم أحم
طبعا بعد ما أكتشفت إن التدوين ملوش لازمة من غيرى تراجعت رأفتا بيكم (وش متكبر)
لا بجد يا جماعة
أولا عارفة أنكم حتقولوا أنى عيلة و ب30 كلمة فى الثانية
بس عادى كل واحد ممكن ياخد قرار غلط و لما يعرف يرجع فيه
بصوا اولا تعليقاتكم فى البوست القديم هدتنى و شوية و فعلا مش حيجرى حاجة لو حتة ربع ساعة كل يوم أشأر فيها عليكوا
بس بجد كلام مجنون فى مدونته حسسنى إنى حد واطى أوى...آه و الله
يعنى فعلا قرار إن حد يسيب التدوين ده أو يخليه حاجة مترجعلوش هو لوحده مدام قرر أنه ينضم للعالم ده
لأن خلاص حيكون فى ناس عرفته و أتعلقت بيه
و انا و الله تخيلت إن شوية من اللى بحبهم يسيبوا التدوين بجد زعلت أوى و فعلا حسيت بنقص
مجنون عنده حق
بصوا أنا حمسك العصاية من النص على الأقل لحد ما أعدى الترم الأول لأن الموضوع مش سهل أبدا أبدا
و تجارة إنجلش معروفة أنها من اصعب الكليات
فبصوا يا جماعة
أنا ممكن انزل بوست أو 2 بس خلال الفترة اللى جاية
و حبقى معاكوا عادى و يا رب يقدرنى بس إنى أرد على كووووووول بوستاتكوا الجديدة
بس لو حسيت إن الموضوع حيخدنى(أنا عارفة نفسى ممكن اقعد أكتر من ساعة لو أندمجت)حسيب الدنيا و أقوم و أقطع شوية مش كتير و حرجع تانى
معلش انا عارفة انى قرفتكوا و جننتجكوا بس حبيت أنى أقولكم آخر حاجة خدتها
لأنى لما فكرت فعلا لقيت أنى أيام الإمتحانات ممكن أكون محتجاكوا أنتوا بالذات أكتر من أى حد تانى
لأنى بحس أنكم بتدوا النصيحة من قلبكوا و كمان بتقفوا مع الواحد صح
ربنا يخليكوا
و على فكرة يا مجنون العالم ده مش هش و لا حاجة
عالم التدوين ده قوى جدا و الناس اللى فيه أجدع ناس

السبت، 4 أكتوبر، 2008

آدى الله و آدى حكمته










عارفة أنى اللى حكتبه ده بدرى اوى و كمان ممكن يخليكوا تستعجبه



أنا نفسى مكنتش فاكرة أنى ممكن أكتب الكلام ده دلوقت بس أهه



زى ما بيقول العنوان ( آدى الله و آدى حكمته)



أنا يا جماعة قررت أسيب التدوين



أيون



حسيبه لحد إمتحانات نص السنة








عارفة إن لسة شهر و شوية على إمتحان نص السنة


بس للآسف أكتشفت أنى فى كارثة حقيقة


عايز تعرف إيه هى كمل معايا للآخر لان كرثتى كرثتين


طبعا أغلبكم دخل الجامعة و عارف إن أول سنة بتكون بلبلة و محدش فاهم أى حاجة و ده حصلى زى ما حصل لأغلب الطلبة


بس حصلتلى حاجة تانية أنئح


للآسف أنا من كى جى1 لحد تالتة ثانوى و أنا بابا بيذاكرلى كل المواد ماعدا العربى و التاريخ و ده لأنى أنا اللى بعته


أيوة.....كل المواد الإنجلش و الساينس و الماث و الجيولوجيا و الإقتصاد و الإحصا و كل المواد ماعدا ال2 اللى فوق دول


كنت ادخل انام فى اوضتى و اسيبه هو قاعد بيذاكر الدروس عشان يعرف يشرحهالى مع أنى كنت باخد فى كل مادة درس خصوصي


أنا مكنش عاجبنى كدة و كنت حاسة أن الكلام ده حيضيعنى و ماما كانت دايما تقوله كدة أنت مش بتنفعها


بس هو نفعنى و جميله فوق راسى لأنه بسببه بعد ربنا طبعا أنا جبت المجموع اللى يخلينى حاطة رجل على رجل و أختار الكلية اللى تدخل دماغى


بس للآسف سابنى فى الجامعة عشان أعتمد على نفسى


تخيلوا سنة أولى جامعة و اول مرة اقعد قدام درس و أحاول افهمه(مهذلة)


كنت دايما أى حته مش فاهمها مش بحاول أساسا افكر فيها هى كلمة واحدة بس كنت بقولها


يا باباااااااااا


نعم


فهمنى


طب تعالى


لوك لوك لوك لوك


فهمتى يا حبيبتى


فهمت


طب تعالى نحل بقى


و بس كدة و كنت احل و اجيب أعلى الدرجات


انا حاسة دلوقتى أنى فى كارثة حقيقة و أنا لما بحس أنى فى مشكلة مش بعرف افكر غير فيها


عشان كدة متضايقة أوى إن فى تعليقات مش برد عليها و مش بعلق على مدونات الناس اللى بحبها


و كمان لسة محطتش المفضلين


فانا بقلكم كدة عشان محدش يزعل أنى مش برد عليه او مش باجى عنده


انا مأخدتش على أنى أكون مهمشة فى مكان أنا فيه و مش عايزة احس كدة و مش ناوية على الإحساس ده


عشان كدة أنا حعافر مع نفسى من أول و جديد و مش حستسلم بس عشان أعمل جهد بابا أنا محتاجة مفكرش فى حاجة تانية


أدعولى


قبل كدة قلت أنى نفسى اكون دكتورة فى الجامعة...بس لو واحدة قالتلى اللى أنا قلته ده و جت قالتلى نفسى اكون دكتورة حقولها روحى نامى فى بيتكوا


ربنا يستر أنا قدام ماما و بابا قوية و مش مبينه انى محتاسة و نفسى أثبت أنه يعتمد عليا


بس انا بجد بموت من خوفى و قعدت اول أسبوع بنام معيطة من بعبع الفشل و مش عارفة انا بذاكر صح و لا غلط و لا إيه


أنا كل اللى طلباه منكم انكم لو أفتكرتونى كدة و أنتوا قاعدين تتدعولى ربنا يوفقنى لأنى محتاجة دعواتكم


و محدش ينسانى آه أنا بقول أهوه (اسألوا كيارا أنا معايا كبريت ممكن أولع بيه أى مدونة تزعلنى أو تنسانى آه)


بس انا ممكن اكتب بوست يوم 10-15


أحكى فيه على الويلكم بارتى بتاعتنا اللى حتتعمل فى باخرة و أغيظ emmy baby (وش بيطلع لسانه)


و يوم 10-17


عشان أحتفل معاكوا بعيد ميلادى


أنا بجد حبتكم أوى أوى أوى


و بشكركم على تعليقاتكم اللى اسعدتنى و على الوقت الجميل اللى قضيته معاكم


و بقول لسها السباعى ربنا يخليكى على إقتراحك ده

و إن شاء الله حنفذه

و اكيد ححطك يا قمراية

الأربعاء، 1 أكتوبر، 2008

و أخيرا أثبت بالدليل القاطع أن دماغى لا تصلح


أيوة و أنت داخل كدة أدخل برجلك اليمين و صلى على النبى كدة و أوعى تخبط حاجة كدة و لا كدة عشان اللوك الجديد بتاع المدونة أصلى فرحانة بيه أوى وأوعى تصور لك نفسك أنى فرحانة باللوك الجديد ده لأنه جديد بقى و كدة و منظر المفروض أنه حلو ...كلا البتا عيب تفكر كدة أنا سر سعادتى إن اللوك ده أتاحلى أنى أعرف و أكتشف إن كان عندى مشروع دماغ و فشل ..أيون بقولها بالفم المليان فشللللللللللللللا و إيه فشل ذريع طبعا عايزين تعرفه ليه فشلأنا أقولكم و أنتوا تحكموا بقا أنا كدة بالصلاتو على النبى روحت أبات عن خالو فى المقطم يوم الوقفة فقررت أنى أنى أستغل الفرصة و اخلى مرات خالى تورينى إزاى أغير شكل المدونة وأجيب قالب جديد غير القوالب اللى كل شوية بلاقيها...جميل جدا خطوة نحو التحديث برافو عليا...و حدث بالفعل بعد صلاة العيد مرات خالو دخلت نامت و بعد 3 سعات صحيت أنا بقى جبتها كدة و قلتلها يللا عايزة اعمل لوك جديد بقى راحت قالتى أنا مش فاكرة أوى فتعالى نروح مدونة آمال و آلام عشان هو شارح فيها الحوار ده و دبينا مشوار من مدونتى لمدونته و المهم بعد الفرجة و تجربة قوالب و طلعت وحشة نجحنا فى إختيار القالب اللى أنتو شايفينه ده و أثناء ما ده بيحصل مرات خالى قالتلى صحيح...أنا لما جيب أغير القالب عندى كل البلوجات اللى كنت كتباها فى المفضلين عندى ضاعت فأنتى خدى بالك...قلتلها طب خلاص أنا حعمل حركة طويلة شوية بس أحسن ما أضيع كل اللى أنا كتباه...قلتها ححط الوصلات على النوت باد و معاها أسامى المدونات و لما أحط القالب اللى ينول الموافقة و الرضا أبقى أحطهم تانى و بضراحة حسيت بالرضا عن نفسى أصلى طلعت بفكر أهوه يا سلام عليكى يا دماغى يالى لو لفيت الدنيا مش حلاقى زيك المهم خلصنا كل حاجة و حطيت القالب اللى حضراتكم شايفينه ده فأنا أثناء ذلك كنت فاتحة حجات كتير أوى و انا مبحبش أقعد و الدنيا زحمة فى التول بار عندى أحب يادوب بس اللى أنا عايزاه هو اللى يكون موجودفالمهم جيت عند النوت باد بتاعة الوصلات و قلت إيه ده إيه الحجات دى و روحت زى الأمورة قافلها الكمبيوتر كتر خيره قالى يا بنتى مش عايزة تعملى سيف للكلام ده و أنا روحت بكل تأكد دايسة على نو و كمان متضايقة إن الكمبيوتر سألنى و شايفة إن ده تضيع وقت المهم بعد كدة روحت بدور على الحتة اللى حطط فيها الناس الجميلة اللى عرفتها ملقتش و مش فاكرة كانت أتعملت إزاى فنديت المنقذ اللى هى مرات خالى و قلتلها أتصرفى قالتلى طب فين الوصلات أنا بقى تنحت و فتحت بقى ليسع جوز فراخ بلدى (و بلاش حمام عشان كيارا متزعلش)قلتها أنا مسحتها..لقتها يا عينى زى ما يكون حد كهربها و تقول مش معقول و تدور فى الكمبيوتر يمكن يكون الكمبيوتر قدر إن انا حد غبى فا مأخدش بكلامى ..بس خلاص اللى أتكسر كان أتغدغ خلاص و لا رجعةو قعدت متنحة فى خلقتى كأنها أول مرة تشوفنى ..و قولتها خلاص و لا كلمة أنا حتصرف عاااااااااااااااااااااااااااااااااااااااااااااااإهىء إهىء أوووووووووووووووووووووووووو
بصوايا جماعة انا أكتشفت حاجة مهمة جدا إن الكمبيوتر هو اللى غلطان أيون محدش يبصلى بشزر كدةهو لازم يعرف اللى قدامه ده عامل إزاى عنده دماغ و لا داقق عصافير مش أى حد يقوله نو يبقى نو و خلاص إيه مفيش تفكير ..ده حتى مفيش أسهل منه
أما بالنسبة لدماغى فأنا قررت آخذ بنصيحة مجنون و أولع فيها و أفكنى منها لأنها خلاص بقت عملة زى الجزمة المستعملة حبقى أرميها و أشترى جزمة جديد...قصدى دماغ جديدة و لو حد ناوى يتبرعلى بدماغ يتصل بيا و انا بنفسى حرد عليه
عاااااااااااااااااااااااااااااااااااااااا
هو سعد زغلول قالها حكمة(مفيش فايدة فى العلاج يا صفية(