الخميس، 24 يوليو، 2008

يا حلاوتك يا دماغى

صحيت يوم الإمتحان الإنجلش سعيدة جدا عايزة أكتب كل حاجة فى دماغى عايزة أقفل زى السنة اللى فاتت.... و الحمد لله خرجت من إمتحان الإنجلش سعيدة واثقة १००% أنى حقفله
ده مش بعيد اللى بيصحح ورقتى يكلمنى عشان ياخد عندى درس و روحت البيت سعيدة جدا...لقيت كل المنتديات عاملة غاغة على سؤال جه فى قطعة الفهم ناس حلاه بشكل و ناس حلاه بشكل تانى(و المدرسين طبعا متفقين على إجابتى انا:))فبقيت سعيدة يا سلام سلم طول عمرى مبفكرش بذكاء فى قطعة الفهم دى أبدا _لأنها للفهم يعنى_و يوم الإمتحان الوحيد اللى فكرت فيه _ده إيه الحلاوة دى_ ربنا يخليكى ليا يا دماغى ...المهم كان أيام الإمتحانات بابا عمال ينقلى الصراع الفظيع بين الطلبة اللى عاملة أجوبة مختلفة فى السؤال ده و أنا طبعا شايفة أنهم أغبية جالهم السؤال و متعاملوش معاه بحنكة_دول اللى حالين عكسى طبعا_ و متضايقة أوى هو ليه بابا عمال ينقل الصراع ...ده كلام فارغ هو انا فاضيه ليه...المهم دارت الأيام و خدت الأجازة و لقيت بابا جى يصارحنى بالحقيقة المرة أنه نموذج الإجابة كاتب الإجابة اللى أنا مكتبتهاش و المدرسين هاجو و ماجو و قالو لأ...راحت المستشارة طالعة زى العسولة قالت كله يمشى حسب نموذج الأجابة...يا حللولى يا حللولى أهى طبلت فوق دماغى فى اليوم اللى شغلتها فيه ...ربنا يخلى دماغى يا رب...أنا من هنا أعلن أننى لن أستخدم دماغى من الآن...و كانت النتيجة أنى نقصت نص درجة فى الإنجلش(آآآآآآآخ)

الأربعاء، 23 يوليو، 2008

أيام الإمتحانات

برغم من إن أيام الإمتحانات دى أكتر أيام بيكون فيها الواحد مشدود و تعبان و عمال يذاكر بس برضه بتكون أجمد أيام السنة لأنك خلاص بتكون حاسس إن البلوة قربت تنزاح و فى نفس الوقت خلاص بتعرف الإمتحان جالك إزاى و أنت حليت إزاى صح بقا غلط المهم أنه خلاص أنتا قربت تخرج من عنق الزجاجة و كمان بتحس أنه الجبل اللى على كتافك عمال بتفتت و يقع حته حته الملل بيقل و الأمل بيزيد و نوره بيبدأ يلعب بعد ما كنت شايفه بعيد دلوقتى عمال يقرب منك...أينعم بيكون فيها أيام مطلعتلهاش شمس زى يوم الفرنساوى فى تانية ثانوى و يوم الإحصاء فى تالتة ثانوى كانو يومين غراب جدا و نكد نكد نكد بشكل غير طبيعى بس برضه أيام لذيذة لأنه خلاص اللى حصل حصل بقا المهم أنه أحنا قربنا نخلص....بجد الثانوية زفت دى عملت للواحد بلادة و خليته يبقا عايز اى حاجة بس يخلص

أنا و الثانوية العامة

يا ساتر على أيام الثانوية العامة دى....أيام الله لا يرجعها ...أى نعم بعد النتيجة الفرحة بتنسى الواحد القرف اللى شافه بس بجد الأيام دى كانت زبالة أوى ....كل يوم الصبح تصحى تترزع قدام الكتاب عمال زى الفقى حفظ فى حفظ فى حفظ و بعدين تنام الضهر لو مفيش درس و بعد كدة تصحى تآكل و تترزع نفس الرزعة و طبعا نص القعدة بتكون قاعد قرفان من حياتك و عمال تحلم بالأجازة و النص التانى عمال تذاكر و تنسى اللى حفظته فى نفس الفسوة و تقعد تشتتم فى دماغك المهببة و فى المناهج و مش بعيد تعيط لما تحس أنه خلاص الدنيا بقت سودة ده كله غير الضغط العصبى أنك لازم تجيب مجموع عشان تدخل الكليه اللى أنتا عايزها و ياسلام بقا لما تصحى زى الامور كدة تبص فى الدروس اللى ذاكرتها قبل ما تنام و متفتكرش منها حرف و تقعد تذاكر فيها تانى ....كل ده غير الملل...حارم نفسك من الخروجات و التليفونات ...وواحدة زى حالاتى كانت تحب تعيش مع كل حاجة خاصة بالحياة إلا المذاكرة كان مقطوع عنى المية و النور و ألف حمد و شكر....لدرجة أنى جيت فى الآخر كنت بعيط لانا عارفة أذاكر و لا أريح لان الراحة بتحسس الواحد بتأنيب ضمير و مع ذلك بتكون اكتر من المذاكرة بس بتكون راحة نكد مش مرتاح و انتا واخدها....أنا مهما كتبت لا يمكن أبدا أوصف القرف اللى شوفته فى السنتين اللى فاته و بجد من كتر تعبى منهم مش قادرة أفتكر أكتر من كدة :(

أخيييييييييرا

الحقيقة إحساس كتابة أول بوست فى المدونة إحساس رهيب متبقاش عارف حيكون رد الفعل إيه و يا ترى حتقدر تنجح و لا لأ و فى نفس الوقت بيكون فى شغف إنك تشوف أول بوست ليك فى المدونة و أكيد حيكون ليه إهتمام من نوع خاص
أنا المدونات دى مكنتش أعرف عنها أى حاجة خالص لحد ما لقيت مرات خالى عاملة واحدة... بدأت بقا أعرف يعنى إيه مدونة الحقيقة لقيتها فكرة ظريفة بس عمرى ما فكرت أنى أعمل واحدة و لما ماما كانت تقولى أبقى أعملى واحدة أقلها طيب و ماله و أنا و لا كان فى دماغى لا طيب و لا ماله و لا كنت عايزة اعملها...بعدين بعد ما خلصت الثانوية العامة لقيت ماما مصرة على الموضوع الغريب ده و أنا بصراحة بعد ما خلصت من السنة القرف دى كنت عايزة اعمل أى حاجة مكنتش قادرة أعملها كنت حاسة أنه الموضوع تخليص حق فقلتلها أعملها يا سلام ....رحت بقا أتفرج على المدونات و آخد فكرة( أصلى كنت عايزة أعملها فعلا عشان تخليص الحق اللى قلت عليه)بعدين قلت و الله دى حاجة جميلة جدا أنك يكون ليك صفحة بتتكلم مع نفسك فيها بصوت عالى و تشارك الكل فى كلامك اللى مع نفسك بجد حاجة جميلة جدا و إن شاء الله أعرف أتكلم مع نفسى كويس هنا;)